3. Hymnus de Vita Christi.

I.

1. Memor ero memoria,
Quod caritate tam pia
Me attraxisti miserans,
Te pro me sic humilians.

2. Tuae passionis memor,
Per quam tam pie redimor,
Pro amore piae matris
Mihi placa vultum patris.

3. Tibi refero gratias,
Qui meas sic miserias
Tam benigne susceperas,
Te pro me sic humilias.

4. Te virgo carens vitio
Conceperat de flamine,
Dum Gabrieli nuntio
Consenserat humillime.

5. Te gravidata caelitus
Cognatam visit citius
Iohannemque celerius
Sanctificans divinitus.

6. Te civitate Bethlehem
Exsultando genuerat
Neque dolorem aliquem
Gignendo te pertulerat.

7. Te regis David genere
Mox natum adoraverat
Ac vagientem ubere
Virgineo lactaverat.

8. Te virgo pannis, fasciis
Constrictum reclinaverat
Et se tuis obsequiis
Omnino mancipaverat.

9. Te magno cum tripudio
Angeli collaudaverant
Atque pacem cum gaudio
In terris concinuerant.

10. Te, Iesu, pastor omnium,
Pastores tunc cognoverant,
Dum in praesaepi Dominum
Iacentem te invenerant.

II.

11. Hinc iuxta ritum hominis
Circumcisionem pertulis
Dulcisque Iesu nominis
Impositionem accipis.

12. Qui et a tribus regibus
Adoraris tam ferventer
Atque magnis muneribus
Veneraris tam decenter.

13. Te die quadragesima
In templum virgo tulerat
Ac Moysi legitima
Spontanee subierat.

14. Mater Herodem fugiens
Aegypto te conduxerat
Tandemque inde rediens
Ad Nazareth reduxerat.

15. Te ad festa pertransiens
Dolorose perdiderat,
Sed mox ad templum veniens
Gaudiose reppererat.

16. Te per manuum opera
Sollicite nutrierat
Et in aetate tenera
In omnibus providerat.

17. Te in Iordanis flumine
Iohannes baptizaverat
Et te cognoscens nomine
Digito demonstraverat.

18. Te Satanas astutiis
Trifarie temptaverat,
Sed eius tu versutiis
Prudenter obviaveras.

19. Iesu matris oraculo

Aquam in vinum verteras,
In quo tuos miraculo
Discipulos firmaveras.

20. Et obsessos quam plurimis
Salvaveras daemonibus
Ac infirmos quam variis
Curaveras languoribus.

III.

21. Lazarum tu cum filio
Orbatae suscitaveras,
Puellam cum prodigio
Ad vitam revocaveras.

22. Iesu, cum peccatoribus
Frequenter manducaveras
His atque paenitentibus
Peccata relaxaveras.

23. Cuius pedes cum lacrimis
Peccatrix irrigaverat,
Prorsus dolens ex intimis
Veniam impetraverat.

24. In monte Tabor deforis
Sic te transfiguraveras
Et gloriosi corporis
Splendorem declaraveras.

25. Cum palmis quam celeriter
In urbem te conduxerant,
Vespere sed quam turpiter
Te vacuum reliquerant.

26. Cena, Iesu, novissima
Pedes tuorum laveras
Escaque nobilissima
Cum sanguine cibaveras.

27. In horto mente anxia
Prolixius oraveras
Et aquam prae tristitia
Cum sanguine sudaveras.

28. Ministri te malefici
Crudeliter vexaverant
Atque Annae pontifici
Te ligatum adduxerant.

29. Vultum decorum turpibus
Sputis commaculaverant,
Diris pugnorum ictibus
Amare vulneraverant.

30. Dehinc Pilati sedibus

Damnandum praesentaverant
Atque te falsis testibus
Dolose accusaverant.

IV.

31. A Iudaeis exhibitum
Herodes te inviserat,
Sed per despectum habitum
Ut fatuum remiserat.

32. Post haec indutum purpura
Columnae adligaverant,
Corona punctum spinea
Flagellis verberaverant.

33. Te confossum vulneribus
Milites subsannaverant
Ac Crucifige vocibus
Iudaei conclamaverant.

34. Te reum quasi sceleris
Pilatus condemnaverat
Et crucis lignum umeris
Propriis baiulaveras.

35. Te calvariae vestibus
Loco, Iesu, nudaverant
Atque manus cum pedibus
Cruci clavis adfixerant.

36. Pro tam diris tortoribus
Preces pias effuderas,
Quando crucis doloribus
Extensus sic defeceras.

37. Iesu latroni omnia
Dimiseras peccamina
Ac paradisi gaudia
Promiseras dulcissima.

38. Iohanni tunc discipulo
Mariam commendaveras
Et ei in patibulo
In filium donaveras.

39. Te derelictum omnibus
Dum patri proclamaveras,
Inimicorum vocibus
Diras sumis blasphemias.

40. Qui dum exhaustis viribus
Sitio exclamaveras,
Fel et acetum faucibus
Morte raucis gustaveras.

V.

51. Sit laus patri cum filio
Pro amore tam nimio
Cum spiritu paraclito
In sempiterna saecula.

41. Prophetarum praesagia
In cruce consommaveras,
Primi parentis debita
Ratione persolveras.

42. In manus patris dederas
Hinc spiritum pretiosum,
Alta voce edideras
Carmen, Iesu, mellifluum.

43. Crucis mortem subieras,
In pace obdormieras,
Tuos ex limbo rapiens
Infernum sic introiens.

44. Satelles latus Domini
Hasta profunde foderat,
Hinc aqua iuncta sanguini
Abundanter profluxerat.

45. Tuum corpus sanctissimum
De cruce deposuerant
Et sepulcrum mundissimum
Eidem aptaverant.

46. Iesu, virtute propria
Victa morte surrexeras
Ac matrem a tristitia
Et dilectos exemeras.

47. Caelorum super sidera
Virtuose conscenderas
Et in paterna dextera
Gloriose resederas.

48. Pentecostali tempore

Spiritum sanctum miseras
Apostolis pro foenore,
Ut antea promiseras.

49. Mariam super aethera
Potenter exaltaveras,
In tua, Iesu, dextera
Decenter collocaveras.

50. Saeculi propter scelera
Venies ad iudicium
Et singulorum opera
Discuties ad ultimum.