43. In Visitatione Beatae M. V.

Ad Nocturnas.
Hymnus Adami Esthoni, Cardinalis.

1. O Christi mater caelica,
Fons vivus fluens gratia,
Lux pellens cuncta schismata,
Maria, Deo proxima.

2. Ex motu veri luminis
Transivit in monticulis
Virgo iuvare vetulam
De praecursore gravidam.

3. Mater venit de Nazareth,
Ut salutet Elisabeth ;
Replentur dono spiritus
Anus et eius filius.

4. Elisabeth complacuit,
Quod mater Dei adfuit ;
Infans gaudet in utero
Praesente Christo Domino.

5. Mariae visitatio

Exemplum dat, pro bravio
Quod sit parata omnibus
Ipsam pie quaerentibus,

6. Trinitatis clementia
Cuncta laxet facinora,
Per matris Christi merita
Nos ducat ad caelestia.

ii. In Visitatione Beatae M. V.

Ad Laudes.
Hymnus Adami Esthoni, Cardinalis.

1. De sacro tabernaculo

Virtutum flos egreditur,
In montis diverticulo
Odor Mariae spargitur.

2. Ex caritatis germine
Elisabeth adpropiat
Et pietatis culmine
Ipsam devote visitat.

3. Salutat servam domina,

Haec matrem Christi nominat ;
Confertur ingens gratia,
Matrem et prolem satiat.

4. En, Christi incarnatio

Per nondum natum panditur,
Hunc adorat cum gaudio,
Qui ventre matris clauditur.

5. Clamat senex in iubilo

Videns Mariae gloriam:
" Beata credens angelo
Fuisti rem veridicam.

6. Hic stupet rerum regula

Naturae mutans ordinem,
Ubi fiunt miracula

Per solum caeli principem.

7. Praesta, virgo piissima,
Sufficiens auxilium ;
Cum sis mater largissima,
Nos visites in saeculum.