7. Roseum Crinale B. M. V.

I.

1. Salve, caeli, terrae decus,
Per te coetus vidit caecus
Captivorum et reorum,
Dum tu regem angelorum
Virgo genuisti.

2. Salve, virginale sidus,
Per te vivit homo fidus,
Per te fides inolevit,
In te verbum Dei crevit,
Virum nec scivisti.

3. Salve, puritatis flumen,
Per te venit ternum lumen,
Fuit et est verum numen,
De quo scripsit vatum rumen
Optans eius ortum.

4. Salve, virtus o virtutum,
Colluctantis tu es scutum
Contra carnis olens lutum
Paenitentibusque tutum
Tu vis dare portum.

5. Salve, caeli plena rore,
Omni digna es honore,
Virga arens es cum flore,
Dum naturae absque more
Genetrix es facta.

6. Salve, virgo dicta diva,
Per te rea gens fit viva,
Quae in valle est decliva;
Ergo nos peccatis priva,
Parens o intacta.

7. Salve, nectar diligentis,
Tu es robur decumbentis,
Es solamen gentis flentis
Et asylum morientis,
Virgo benedicta.

8. Salve, vitis ubertatis,
Salve, decor maiestatis,
Nos tuere a damnatis
Nec non universitatis
Dele tu delicta.

9. Salve, nubes rorans mella,
Salve, trinitatis cella,
Ad plasmantem tu appella
Pro nobis, ne in procella
Maris submergamur.

10. Salve, salutare donum,
Omnis laudis tenens tonum,
Redde nobis natum pronum,
Ut omnes ad summum bonum
Sursum rapiamur.

II.

11. Salve, mater Dei dia,
Salve, veritatis via,
Talem fatur prophetia,
Quod de te vera sophia
Christus nasceretur.

12. Salve, vellus Gedeonis,
O lucerna rationis,
Fortitudo tu Samsonis,
Fac, ut per te nunc draconis
Virus percassetur.

13. Salve, dulcis cordis risus,
Tu es verus paradisus,
Per te mundus est gavisus,
De te ortus dum est visus
Abraham caelestis.

14. Salve, odor balsamorum,
Quae vocaris rosa florum,
De te chori angelorum
Mirantur et populorum,
Est scriptura testis.

15. Salve, o orantis vitta,
Salve, mira magarita,
Duc nos ad superna sita,
Ubi est aeterna vita
Tempestate carens.

16. Salve, sponsi tu cancelle,
Tu, quae pronum habes velle
Caeli nos cibare melle,
Labis nefas mox repelle,
Per quam mens est arens.

17. Salve, castitatis villa,
Tu es vere virga illa,
Quam divini roris stilla
Fecundavit et scintilla
Flaminis incendit.

18. Salve, reparatrix pacis
Indeficiensque satis,
Tu es fervor ardens satis
Cum virtute, quod rapacis
Lupi faux nil prendit.

19. Salve, rubens o aurora,
Salve, nimis o decora,
Reos tunc in mortis hora
Transfer sursum sine mora.
Ut laus tua crescat.

20. Salve, virgo sine pare,

Salve, summae marmor arae,
Te creavit rex tam gnare,
Primi ut parentis thare
Per te evanescat.

III.

21. Salve, gemma o gemmarum,
Tuum nomen cunctis carum
In dulce vertit amarum
Et impurum facit clarum,
Haec sunt mira vere.

22. Salve, Aaron florens lignum,
Te praemonstrat caeli signum,
Laborare tu malignum
Computasti et indignum
Pro labenti aere.

23. Salve, caelum tangens scala,
Tu operiens es mala,
Quae dederunt Adae mala,
Da, ut tua nunc sub ala
Stemus in censura.

24. Salve, veri solis rota,
Es in mente munda tota,
Famulantum tolle vota
Et aerumnam nostram nota
Propter adfutura.

25. Salve, vere sciens iura,
Per te mens purgetur dura
In effectuque sit pura,
Esse ut possit secura,
Ipsam ne quis laedat.

26. Salve, nobilis regina,
Nulla quam terret ruina,
Tu sanctorum es piscina,
De qua vera medicina
Nobis arridebat.

27. Salve, nimis firma vectis,
Tu resistis retroiectis
Daemonum protervis sectis
Ipsosque horrore plectis
Nomine, Maria.

28. Salve, o lucens lunaris,
Tu in terris operaris
Quasi radius solaris,
Merito tu appellaris
Summa hierarchia.

29. Salve, quae catervas gentum
Illustrasti diffidentem,
Tu aureolas fers centum,
Quas tibi dat rex regentum,
Sponsus puellarum.

30. Salve, virgo o Maria,
Salve, paradisi via,
Tu es super omnes dia,
Tu es verax, mitis, pia,
Fugatrix poenarum.

IV.

31. Salve, speculum o purum,
Per te Deus struxit murum,
Hostis ut fugaret durum
Genus, animarum furum,
Quas ipse formavit.

32. Salve, nostra o tutela,
Nefas in agone cela,
Remove obscura vela
Illum nobis et revela,
Qui te. sic beavit.

33. Salve, rubus flammans mire,
Te colenti te largire,
Illum placa die irae,
In quo fons est omnis scire,
Vitae dos aeternae.

34. Salve, o iustorum forum,
Cohors fugit te stultorum,
Ardentes in caelis quorum
Inter choros angelorum
Non erunt lucernae.

35. Salve, altitudo montis,

Salve, claritudo fontis,

Vere vita es insontis,

Fortitudo tu es pontis

Mare transientis.

36. Salve, gaudium gementum,
Salve, firmum fundamentum,
Vires excellis potentum,
Scrinium es opulentum
Imperas et ventis.

37. Salve, quae nunquam ruisti
Ac per hoc promeruisti
Super omnes choros sisti,
Ubi dextera te Christi
Mire laureavit.

38. Salve, caeli dulcor, panis
Valens sanis et insanis,
Da, ut nostra mens inanis
Per te trahatur a vanis,
Linquat, quod amavit.

39. Salve, virga stirpis Iesse,
Da nos in superna messe
Sine fine omnes esse
Semper cum aeterno Esse,
Qui est vera quies.

40. Salve, o secura navis,
Salve, o thesauri clavis,
Quam Iohannes vidit, avis,
Tu in tenebris es pravis
Claritatis dies.

V.

41. Salve, summi favum mellis,
Castis immoraris cellis,
Omne genus ta excellis
Et, quod sordet, tu depellis
Tua cum virtute.

42. Salve, galaxia Dei,
Miserere, virgo, mei,
Tu da sursum corda vehi,
Possint ut uniri legi,
Sic vivamus tute.

43. Salve, terrens o balista,
Salve, militantis cista,
Errat sine te iurista,
Nam de te scripsit psalmista
Veritatis normam.

44. Salve, throni o sedile,
Salve, aureum monile,
Tu ipsius es cubile,
Qui cunctorum dedit hylae
Obnascentum formam.

45. Salve, aula summi regis,
Tu illustras cor exlegis,
Desperantis crimen tegis
Et in paradisum vehis,
Qui te amavere.

46. Salve tu, quae deviantes
Dirigis et iuvas stantes,
Terres tu nos infestantes,
Et te semper venerantes
Nunquam periere.

47. Salve, sceptrum o regale,
Praeformosum atque tale,
Cui non patet aequale'';
''Ergo dic, o virgo, vale,
Nunc me trahe sursum.

48. Salve, dulce tempus veris,

Tu virtutum sertum geris,

Tuque omne pravum teris

Et sanctorum semen seris,

Meum rege cursum.

49. Salve, sponsa, quae curantem
Genuisti ut infantem,
Serva, pia, te laudantem
Per hoc scriptum et orantem,
Roga, ut salvetur.

50. Salve, pietatis vena,

Hunc a culpa et a poena
Absolve, virgo serena,
Qui te cum hac quinquagena
Dietim veretur.