11. Rosarium beatae Mariae V.

Auctore Iacobo Merlone Horstio.

I.

Salve, mater pietatis,
Per aeternum trinitatis

Condita consilium,
Ut immensum, increatum
Verbum patris incarnatum

Mater gignas filium.

1. Gaude, caelum, et mirare,
Psalle, terra, plaude, mare,

Deum laudent omnia,
Nam creator potens iure
Novo foetu creaturae

Mundo parat gaudia.

2. O quam felix et praeclara,
Deo grata, nobis cara,

Virginis conceptio,
Quae parentes infecundos
Prole, beat nos immundos
Vitae beneficio.

3. O quam praestans atque pura,
Quae transscendens carnis iura

Nescit improperium,
Eia, clausum plaude caelum,
Recreatur, en, anhelum

Patrum desiderium.

4. O quam felix fulsit hora,
Qua consurgens haec aurora

Mortis umbram dissipat,
Quae, natalem nacta purum,
Tota pulchra iam venturum

Mundo solem nuntiat.

5. O beata, quae futura
Dei mater es natura,

Nobis mater gratiae,
Paradisus voluptatis
Et asylum libertatis

Causaque laetitiae.

6. Novum zeli mox exemplum
Das, tenella, petens templum

Praesentanda Domino
Et ter quinos trima scandis
Gradus, prima casto pandis

Vota libens animo.

7. Hinc devota famularis
Manens templo nec lassaris

Domini servitio,
Psallis, oras et laboras,
Deum laudas et honoras

Proximos officio.

8. Hinc accendunt omnem sexum
Castitatis ad amplexum

Virginis vestigia,
Erat olim laus fecundis,
Sed iam nova profert mundis
Virgo privilegia.

9. Ergo matrem salvatoris
Votum cordis et vox oris

Celebret in iubilo,
Cuius ortus medicinam,
Cuius vita vim divinam

Dat languenti saeculo.

10. Te rogamus voto pari,
Fac, nos portu salutari

Dei sistat gratia,
Da virtutem castae mentis,
Nec, quem calcas tu, serpentis

Perdat nos versutia.

IL

Salve, virgo salutata

Et mox fructu fecundata,

Quo salvantur saecula,
Verbum, virgo, concepisti,
Paranympho dum fuisti

Gabrieli credula.

11. Regi regum quam fuisti
Digna sponsa, quae fulsisti,

Ut in spinis lilium !
Sic consortem iam naturae,
Sed mutato carnis iure
Dei capis filium.

12. Virgo viro desponsaris,
Sed fis mater expers maris,

Virgo gestas uterum;
Ioseph timet, sed securum
Reddit angelus et purum

Promovet coniugium.

13. Rubus olim ardescebat,
Sed nil ignis depascebat,

Quin illaesus viruit,
Sic virtute spiritali
Salvo flore virginali

Virgo Deum genuit.

14. O mirandam novitatem,
Matris ornat castitatem

Filii conceptio,
Eva mortis tulit ictum,
Ave delet maledictum,
Cedit iam deceptio.

15. Prima parens nobis luctum,
Sed secunda vitae fructum

Protulit cum gaudio,
Eva iugo servitutis,
Sed Maria nos salutis
Afficit remedio.

16. Tu naturae contra ritum
Arto praegnans infinitum

Ventre claudis parvula,
Homo Deum, stella solem,
Nata patrem, virgo prolem,

Antiquum iuvencula.

17. Uno sinu capis agnum

Et leonem, parvum, magnum.

Finem et principium
Et mortalem aeternumque
Et caelestem terrenumque,

Servum atque Dominum.

18. Huius nodum sacramenti
Non subtilis arguenti

Pandet indagatio,
Nosse modum non est meum,
Scio tamen posse Deum,

Quod non capit ratio.

19. Quis non laudet et laetetur,
Quis non gaudens admiretur

Opus tantae gratiae?
Ut ascendat homo reus,
Quo descendit potens Deus

Servi tectus specie!

20. Et tu, virgo tam praeclara,
In qua gesta sunt tam rara

Domini mysteria,
Per haec, precor, nos peccatis
Et terrenae pravitatis

Exime miseria.

III.

Salve, virgo, Christi parens,
Virgo, salve, labe carens,

Salve, flos o virginum,
Donum gestans singulare,
Paritura sine pare

Mox ancilla Dominum.

21. Pergens ergo post conceptum
Per montana mox effectam

Tantae monstras gratiae,
Hinc cum matre visitata
Sensit proles nondum nata

Tuae vim praesentiae.

22. Dum se matres amplexantur,
Mox utrimque revelantur

Prolium magnalia;
O quam pium fert amorem,
Quantum praestat et honorem

Virginis praesentias

23. Ecce, manus prophetarum
Mox percepit iubar clarum

Salutante domina;
Et quis erit peccatorum,
Quem non dives meritorum
Beet tanta femina?

24. Quisquis ergo sis, memento,
Quantum nostri munimento

Favor prosit virginis,
Cui Deus maiestatis
Magna tot vi potestatis

Causa fecit hominis.

25. Caput anguis haec contrivit,
Cuius formam concupivit
Rex aeternae gloriae,
Nihil ira trux serpentis,
Nihil in hanc vis frementis
Potuit invidiae.

26. Haec est virga ferens florem,

Felix terra salvatorem

Germinans fidelibus,

In hac natum caeli rore

Manna grato dans sapore

Robur viatoribus.

27. Haec est ille fons signatus,
Hortus clausus et rigatus

Gratiae fluminibus,
Haec est vellus trahens rorem,
Ager plenus dans odorem

Cunctis terrae finibus.

28. Haec est thronus Salomonis,
Cui nullus par est in donis

Arte vel materia,
Ebur candens castitatis,
Aurum fulgens caritatis

Denotat mysteria.

29. Arca, turris haec vocata
Et castrorum ordinata

Acies terribilis,
Lignum vitae, scala caeli,
Omni patens urbs fideli,

Arx inexpugnabilis.

30. Porta caeli, templum Dei,
Maris portus, ad quem rei

Currunt cum fiducia,
Nec auditum, quod salutis
Implorata destitutis

Deneget auxilia.

IV.

Salve, mater novi moris,
Expers paris quae doloris

Salvatorem gentium,
Nil hic foedum, nil probrosum,
Talem matrem tam formosum

Decet puerperium.

31. Gigas velox, pugil fortis,
Princeps pacis, victor mortis,

Rex immensus gloria
Ad currendam venit viam,
Complens in se prophetiam
Legisque mysteria.

32. Sed o vilis apparatus!
Caeli rex ac terrae natus

Pauper est obsequio,
Ecce, rector angelorum
Boum consors et pastorum

Iacet in praesaepio.

33. Homo suum parit Deum,
Fovet, tractat, nutrit eum,

Fert portantem omnia,
Cibum pani, potum fonti,
Victum vitae, cunas monti,

Soli praebet lumina.

34. Dulce mater os lactavit,
Cuius manus nos formavit

Et dat escas omniam,
Qui se nascens in consortem
Et in lytrum passus mortem,

Regnans dat in praemium.

35. Sed cur, mater summi regis,
Ultro subis iussa legis,

Legi non obnoxia?
Pura tota cur purgari,
Cur vis pauper aestimari

Vulgi portans munera?

36. Pulchra trias o virtutum,
Quibus claret hic imbutam

Matris cor et filii,
Oboedire iam paratis
O quis amor puritatis,

Quae paupertas animi!

37. Quos transgressor necat pomo,
Christus salvat factus homo

Miro prorsus ordine,
Adam primus per consortem
Perdit nos, secundus mortem
Destruit in virgine.

38. Num abhorres peccatores,
Sine quibus nunquam fores

Tanto clara filio?
Si non essent redimendi,
Nulla tibi pariendi
Redemptorem ratio.

39. Sed quam prompta sis amore
Pro materni cordis more

Dextram ferre miseris,
Monstras signi spe divini,
Dum pro sponsis curam vini

Supplex nato suggeris.

40. En, o mater pietatis,

Quantam nostris spem rogatis

Tua dent praesidia I
Per te Deum quaerit reus,
Ad quem per te venit Deus,

Sis amborum media.

V.

Salve, mater, quae pendentem
Et pro nobis morientem

Cruce cernis filium'';
''Heu, quis dolori perdis natum,
Cuius vice commendatum

Recipis discipulum.

41. Qui surrexit vincens mortem
Caelo locat te consortem

Patris sedens dextera,
Miro gaudes aucta dono,
Dum sublimi fulges throno

Caeli calcans sidera.

42. Sed nec terra fas abscondi
Corpus, ex quo sator mundi

Et salvator prodiit,
Iure carnis vincit iura,
Quae non unquam peritura

Verbum carne vestiit.

43. Exaltatae supra caelos
O quo plausu dulce melos

Caeli canunt agmina!
Quidni caelo, terra, mari
Virgo debet celebrari
Undequaque domina?

44. Ergo, virgo sic promota,
Causa nostri nostra vota

Promovenda suscipe,
Quodsi reos sancta spernis,
Ut quid sis praelata ternis
Hierarchiis, respice.

45. In hac valle lacrimarum
Nihil constans, nihil clarum,

Suspecta sunt omnia Quid hic nobis erit tutum,
Cum nec ipsa vel virtutum

Tuta sit victoria?

46. Caro menti reluctatur,
Mundus carni suffragatur

Nobis in perniciem,
Satan instat nos infestans,
Nunc se palam manifestans,

Nunc occultans rabiem.

47. Tot ac tantis lacessiti
Non valemus, heu, reniti

Passi damna virium;
Hinc sagittis tot ferimur,
Hinc diversis irretimur

Laqueis venantium.

48. Sed, Maria, mater Dei,
Tu post natum fida spei

Anchora fidelium,
Tu solatrix miserorum,
Tu patrona peccatorum,

Pressis fer auxilium.

49. Intendentes tuae laudi
Nos attende, nos exaudi,

Nos a morte libera,
Quae post Christum prima sedes,
Inter nati coheredes

Clientes adnumera.

50. Natus patri cruentatum
Cor et corpus vulneratum,

Sed tu monstras ubera;
Et quis possit non audiri,
Ubi constat tot uniri

Amoris insignia?

Pater summae maiestatis,

Iesu, rex clementiae,
Spiritus, fons sanctitatis,

Unius potentiae,
Per tot dona pietatis,

Auctor indulgentiae,
Confer opem desolatis

Et augmenta gratiae.