51. De sancto Placido.

In 1. Vesperis.

Antiphonae.

1. Exsulta, pater monachorum

Cernens mira filiorum,

Qui de bellis tormentorum

Scandunt regna supernorum.

2. Nam, ecce, miles, Placidus

Saevis paret conspectibus

Et Flavia cum fratribus

Trigintaque complicibus.

3. Exspoliantur milites

Et sancti Dei proceres,

Caeduntur saeve fustibus,

Acris mactantur ictibus.

4. Replentur sibi gaudiis,

Exsultant in suppliciis,

Iesum fatentur laudibus,

Diis Deum prae omnibus.

Ad Magnificat.

A. O decus Christi tironum

Exemplarque mirabile,

Quorum ordo monachorum

Rubescit fuso sanguine,

Testerque chorus nitescit

Super nivem dealbatus,

Florum decore fulvescit

Meritis magnis ditatus,

Precamurque lacertorum

Sublevari auxilio

Vestrorumque meritorum

Eripi ab exsilio.

Ad Matutinum.

Invitatorium.

Christum regem,

venite, adoremus,

Et coram suis militibus

venite exsultemus.

In 1. Nocturno.

Antiphonae.

1. Puer septem annorum

A suo patre ducitur,

Datus patri monachorum

Ad caelestia tollitur.

2. Hic spretis mundi gaudiis

Et omnibus divitiis

Sub magni patris monitis

Fit omnibus mirabilis.

3. Bellator miles Placidus

Patris praecepta, sequitur,

Legis Dei non nescius

Siciliam ingreditur.

4. Hic mundo fuit mortuus

Suisque voluntatibus,

Cunctis fulgens virtutibus

Gessit mira divinitus.

5. Athleta Christi Placidus

Martyrium adducitur

Atque cum suis fratribus

Forti catena stringitur.

6. Exspoliantur milites,

Caeduntur saevis fustibus,

Exemplo quorum desides

Accendantur ardoribus.

Responsoria.

1. Ex nobili prosapia

Septennis erat Placidus,

Quando divina gratia

Ad debellandum vitia

Est Benedicto traditus;

V. Vere tu vas virgineum,

Sanctis plenum liquoribus,

Tu pectus habes igneum,

Plenum sacris ardoribus.

2. De luce splendor micuit,

De mundo virga floruit,

Cuius de ramis prodiit

Athleta Christi Placidus,

Omni virtute fulgidus;

V. Dum totus mundo deficit,

Mentem in Deo collocat

Semperque cruci configit

Omne, quod caro clamitat.

3. Siciliam ingrediens

Ut radix bona pullulat,

Ut pater multos generat,

Quos Christo sursum dirigens

Talentum Christi duplicat ;

V. Agrum serens dominicum,

Sicut a patre didicit,

Suis dat panem caelicum,

Quo turbam sanctam reficit.

4. Dum huius fama volitat,

Nimis odor se ampliat,

Ad Christum fratres convocat,

Quos verbis sacris consolans

Hortatur ad certamina ;

V. Hic sobrius et humilis,

Castus, prudens, immobilis,

Multis splendet miraculis,

Pons, via, salus populis.

In 2. Nocturno.

Aatiphonae.

1. Fantur: Negate, perfidi,

Iesum, quem stulte colitis,

Nostro libate conciti,

Quem perperam despicitis.

2. Unus est nobis animus

Unusque ordo vivendi,

Una fides, pro qua, Deus,

Voluntasque moriendi.

3. Sancti gratias agebant

In tormentis congaudentes,

Aequo animo psallebant

Infideles deridentes.

4. Pectus habent immobile,

Quo fractus hostis vincitur,

Soli Deo volubile,

Cui amans subicitur.

5. Istorum ignis spiritus

Exstinguit ignem penitus,

Amoris flamma devorat

Omne, quod mundus irrogat.

6. Lingua praecisus Placidus

Christum fatetur Dominum,

Qui dominatur omnibus,

Deus deorum omnium.

Responsoria.

1. Hi confitentur Dominum,

Qui pergunt ad supplicium

Minas spernentes hominum,

Quos confitetur Dominus

Angelis coram omnibus,

V. Utuntur verbi gladio

Facti sunt, testes Domini,

Semper fortes in proelio

Nulli cesserunt homini.

2. Isti amicti lumine

Et fortes in certamine

Scutum habent pro tegmine

Fidem speique galeam

Iustitiaeque loricam ;

V. Vobis datum est edere

De ligno vitae prospere,

Pro nobis quoque petere

Dignemini et propere.

3. Sicut sol insti fulgebunt,

Quosque nullus tanget aestus,

Et in mensa consedebunt,

Quibus ministrabit Christus,

Perenne donans gaudium ;

V. Vestra laus Deus est summus,

Corona, lux et praemium

Et mercedis vitae nummus,

Qui est omne solacium.

4. Vos estis turres Domini,

Qui adversantes daemoni

Cessistis divo lumini,

Ad bella nunquam pavidi,

Sed semper magis fervidi,

V. Castra non debellata

Columnaeque immobiles,

Vos turma laureata

Vosque invicti pugiles.

In 3. Nocturno.

Ad Cantica.

A. Verbo, vita et sanguine

Isti confessi Dominum

Omni pulsa formidine

Hoc calcaverunt saeculum.

Responsoria.

1. Ave, stella radiosa,

Virgo nitens et formosa,

Christi sponsa gloriosa,

Tu es murus facta fortis,

Turris passa crucem mortis ;

V. Pulchra sponsum vulnerasti,

Quando ipsum adamasti,

Per quem corpus cruentasti

Et te ipsam immolasti.

2. Ecce, proles Dei patris,

Summum decus veritatis,

Fons amoris vitae gratis

Te in ulnis elevavit

Et in caelis coronavit;

V. Felix, virgo, lumen solis

Respectu caenum est prolis,

Cuius frueris amoris

Vitae pacis et dulcoris.

3. En, cantica laetitiae

Nostrae quoque militiae

Hoste victo nequitiae

Cantamus coram Domino

Regnante sine termino,

V. In organis et citharis

Cunctis devictis hostibus

Et mentium tripudiis

Cum dilatatis cordibus.

4. Expletis bellis inclitis

Cum palma sursum pergitis,

Per plateas discurritis

Christo melos dulcissimum

Canentes in perpetuum;

V. Estote nostri memores,

O gloriosi martyres,

Pro nobis preces fundite,

Ab hoste nos eripite.

In Laudibus.

Antiphonae.

1. Triumphum belli canimus,

Magnum festum peragimus,

Dum fratres nostri caelibes

Facti sunt Dei martyres.

2. Athleta Christi Placidus

Poenas pro Christo fortiter

Et Flavia cum fratribus

Crucem ferunt alacriter.

3. Vestra rubescunt corpora

Fuso cruore roseo,

Nostra usta sunt pectora

Amoris telo flammeo.

4. Gustant amara dulciter

Dulcis amoris poculo,

Cuiusque clavo fortiter

Adfixi sunt patibulo.

5. Amoris nexu valido

Iuncti sunt Christo fortiter,

In quorum cordis medio

Dilectus est perenniter.

Ad Benedictus.

A. O vos proceres beati,

O cruenti martyres,

Christi pugiles probati

Et laureati milites,

O zelatores fervidi

Et congressores validi,

Vos peractis agonibus,

Summis locati sedibus,

Amicti stolis candidis

Gemmisque plenis fulgidis

Exsultatis perenniter.

Ad Magnificat.

A. O globus invincibilis,

Armis indutus bellicis,

Flammis accensus lucidis,

Hostis depulsis iaculis

Sub alis nos protegite

Amoremque succendite

Nosque sursum erigite

Christoque salvos reddite.