56. In Assumptione Beatae M. V.

Ad Processionem.

R. Salve, festa dies, toto venerabilis aevo
Qua genetrix deica sumitur ad supera.

1. Splendida flammifero iam nubit Cynthia Phoebo,
Mitis glorifico virgo Maria Deo.

2. Ad Iovis astriferum rapitur Proserpina regnum,
Ad caeli celsum stella marina thronum.

3. Sole repercussus rutilat fulgore beryllus,
Stella maris Phoebo praeradicata suo.

4. Gaudent terrigenae, resonat terris diapente,
Cum virgo castrum scandit ad aethereum.

5. Omnis caelicola libat praedulcia tura

Laudum; sic crepitat candida virginitas:

6. "Pura parens, Christum pariens et virgo perennis
Exstans, aureolam percipe virgineam."

7. Turba tonat rosea: "Victricem percipe palmam;
Fert crux signa tui lucida martyrii."

8. Est virtutis honor, meritis meriti diadema ;
Ergo "Veni, domina" vox sonat angelica.

9. Felix almiflui philomenat rector Olympi:
" Ad sedem regni nunc, mea sponsa, veni.

10. Scande super Seraphin aciem figens aquilinam
Phoebi glorificis perpetuis radiis."

11. Iure colenda dies in honore Dei genetricis,
Qua datur arce poli trina corona sibi.

12. Stella maris, cymbam Petri nunc turbine quassam
De Scylla tristi transfer ad astra poli.