97. Ad sanctissimam Trinitatem.

De Operibus sex dierum et Donis Spiritus sancti.

I.

1. Mundi creator optime,
Quo luce lux est reddita
Luxque divisa tenebris
Primo dierum saeculi,

2. Aetate prima saeculi
Te luce viget ratio,
Qua Deo docti homines
Artes excercent varias.

3. Lux, Christe, nostras tenebras
Luce timoris effuga,
Ut, qui eramus tenebrae,
Lux simus in te, Domine.

4. Sit trinitati gloria,
Virtus, honor, victoria,
Quam sua laudant opera
In saeculorum saecula.

II.

1. Verbi patris imperio
Caeli convexa firmitas
Aquas ab aquis dividit
Secundo die saeculi.

2. Secunda aetate saeculi
Archae compacta firmitas
Locatur inter caerula
Fidos infidis segregans.

3. Rex, Christe, nostra ''firmitas,
''Tu motns carnis cohibe
Nosque in bonis robora
Dans pietatis spiritum.

4. Sit trinitati gloria,
Virtus, honor, victoria,
Quam sua laudant opera
In saeculorum saecula.

III.

1. Sub caelis aquae confluunt,
Virens apparet arida,
Fit paradisus Domini
Saecli dierum tertio.

2. Aetate saecli tertia
Gentes in ritu coeunt,
Sancta surgit plantatio
Hebraea gens in patribus.

3. Fons vitae, nobis influens
Virtutum quadro tramite
Tibi nos hortum perfice
Sanctae dono scientiae.

4. Sit trinitati gloria,
Virtus, honor, victoria,
Quam sua laudant opera
In saeculorum saecula.

IV.

1. Caeli perornant cameram
Mundum calore temperans
Sol, luna cum sideribus
Quarto dierum saeculi.

2. Aetate quarta saeculi
Regni virtus Davidici
Cum synagoga splenduit,
Sancti prophetae radiant.

3. Sol, Christe, nos irradia
Dans dona ''fortitudinis,
''Tuusque candor faciat
Ministros verbi splendidos.

4. Sit trinitati gloria,
Virtus, honor, victoria,
Quam sua laudant opera
In saeculorum saecula.

V.

1. Iussae producunt reptile
Aquae viventis animae,
Quae colos, aquas permeant
Quinto dierum saeculi.

2. Aetate quinta saeculi,
Iudaea qua gens exsulat,
Partim se miscet gentibus,
Partim spe caelos habitat.

3. Christe, verbum ''volatile,
Piscis, ''homo sub tempore,
Verbo sacrisque promove
Alto tuos consilio.

4. Sit trinitati gloria,
Virtus, honor, victoria,
Quam sua laudant opera
In saeculorum saecula.

VI.

1. Homo facturae conditae
Plasmatur decus nobile
Divinam ad imaginem
Sexto dierum saeculi.

2. Aetate sexta saeculi
Christus, decus ecclesiae,
Iure praefertur omnibus
Patris imago genitus.

3. Consigna, boue Domine,
Nos tui vultus lumine,
Sic intellectus splendeat,
Ut te cor viso gaudeat.

4. Emanuel, nos perfice
Tu patris ad imaginem
Quin et similitudinem
Donis intelligentiae.

5. Sit trinitati gloria.

VII.

1. Complevit opus ''septimo
''Die Deus, quod fecerat,
Quo requiescens sabbato
Benedicit, sanctificat.

2. Aetate saecli septima
In animarum requie
Quiescit sanctarum Deus,
Quarum laborem tulerat.

3. Tu, Christe, nostra ''requies,
''Mites et corde humiles
Nos in te tandem compleas
Spiritu sapientiae.

4. Sit trinitati gloria,
Virtus, honor, victoria,
Quam sua laudant opera
In saeculorum saecula.

VIII.

1. Dies aetasque ceteris
Octava splendet sanctior,
In te quam, Iesu, consecras,
Primitiae surgentium.

2. Tu tibi nostras animas
Nunc primo conresuscita,
Tibi consurgant corpora
Secunda morte libera.

3. Tibique mox in nubibus,
Christe, feramur obviam
Tecum victuri perpetim,
Tu vita, resurrectio.

4. Cuius videntes faciem
Configuremur gloriae;
Te cognoscamus, sicut es,
O vera lux et suavitas.

5. Regnum, cum patri traditos
Plenos ''septeno chrismate
''In temet nos laetificas,
Consummes, sancta trinitas.

6. Sit trinitati gloria,
Virtus, honor, victoria,
Quam sua laudant opera
In saeculorum saecula.