97. In Translatione ss. Anastasii et Domnii.

1. Sacra scrutantur pignora,
Pia sanctorum corpora
Domnii et Anastasii
Iussu devoti populi.

2. At praesul venerabilis
Ioannes, Deo amabilis,
Confortat cives nobiles
Ac laudat et ignobiles,

3. Inter ruinas vepribus
Condensas atque frondibus
Urbis Salonae fodere
Nutu divinae gratiae.

4. Muneris tanti praemium
Repertum Anastasium
Primo transferunt Spalatum
Deinde patrem Dominum.

5. Ubi multa miracula
Virtutes et prodigia
Eorum fiunt meritis
Ad salutem christicolis.

6. Laetetur urbs egregia,
Devota sumat gaudia
Thesauro tam perfulgido
Suscepto cum tripudio.

7. Catervam Christi, martyres
Nostras ad sedes stabiles,
Ferte frui caelestibus
Vestris orationibus.

8. Deo Patri sit gloria,
Laus quoque sit perpetua
Filio unigenito
Cum spiritu paraclito.

OS. De sancto Andrea Apostolo.

1. Exorta a Bethsaida
Duo suscepit lumina
In Petro atque Andrea
Primitiva ecclesia.

2. Quos arte piscatoria
Quaerentes victualia
Vocavit et constituit
Iesus piscari homines.

3. Andreae festa gerimus
Eumque prece quaerimus,
Ut cum caeli clavigero
Conciliet nos Domino.

4. Exsultet Patras civitas,
Exsultet et Achaia,
Andreae quae apostoli
Sanctita est martyrio.

5. Nostra simul ecclesia
Resultet ad haec gaudia,
Apostoli quae annua
Nunc recolit sollemnia.

6. Astrictus cruci funibus
Dignus Deo apostolus
Pendebat vivus biduus
Christum praedicans populo.

7. Nos idem Christi famulus
A vitiorum nexibus
Solvat summisque civibus
Coniungat suis precibus.

8. Hoc genitor praestet summus
Genitorisque filius,
Sanctus simul paraclitus,
Trinus et unus Dominus.