119. De sancto Augustino.

Ad Laudes.

1. Alme pater, Augustine,
Doctor anguste, nos fove,
Qui phiala ut aurea
Praefulges in ecclesia.

2. Fundens vinum scientiae
Nectarque sapientiae
Lac potum praebes parvulis,
Aegrotos lympha reficis.

3. Tu, veri sequax Aaron,
Stirpem regis leviticam
Docens in clero terream
Sortem non esse debitam.

4. Te byssus ornat retorta
Cum tunica iacintina,
Dum carnis prae munditia
Contemplaris caelestia.

5. Tu malis rubes punicis,
Personas tintinabulis,
Dum, quod exemplo rutilas,
Verbo confessor praedicas.

6. Bis senas gemmas pectoris
Nexu stringis numeralis
Mentis purae charismata
Pia vertens in opera.

7. Cinctus zona plumaria
Praefulges auri lamina,
Qui vitam post castissimam
Supernam tenes gloriam ;

8. Qua dum in Christo frueris,
Hanc posce tuis filiis,
Quo te patrono veniam
Consequamur et gratiam.

9. Sit trinitati gloria,
Honor, virtus, victoria
Regnanti super omnia
Saeculorum per saecula.