131. De s. Benedicto Nursino.

1. Ad laudem summi principis
Hymnum canamus hodie
Atque Mariae virginis,
Matris misericordiae.

2. Benedictus a Domino
Deo patre et filio
Atque sancto paraclito
Gaudet aeterno iubilo.

3. Gaudet divina trinitas
De Benedicto hodie
Atque Christi humanitas
Concepta sine semine.

4. Gaudet caelestis curia
De Benedicto famulo
Atque mater ecclesia
Cum Romano imperio.

5. Gaudent sancti archangeli
De Benedicti ordine
Et universi angeli
Caelestes sine crimine.

6. Gaudent sancti apostoli,
Confessores et virgines
De regula sanctissimi
Benedicti et virginis.

7. Gaudet tota Italia
Cum omni suo populo
Atque fidelis Nursia
De suo primogenito.

8. Gaudeamus in Domino
Nos omnes veri clerici
De Benedicto monacho
Et omnes sancti monachi.

9. Hic tactus sacro lumine
Omnem errorem respuit,
Hic totum mundum renuit
Et semper dives exstitit.

10. O divina clementia,
O summa sapientia,
Quae fecit talem hominem
Esse divitem pauperem.

11. Hic vir in terra habitans,
In caelis semper meditans,
Hic vir non vir, sed angelus
Omni virtute praeditus.

12. Tu divinorum hominum
Corona es et omnium,
Per te fides catholica
Nitet per mundi climata.

13. Hic pater vere inclitus,
Hic spiritus seraphicus,
Hic est in carne angelus
A Deo missus caelitus.

14. De eius plenitudine
Totus mundus irradiat,
De magno suo ordine
Repleta est ecclesia.

15. Hic est secutus regulam
Divinam et apostolicam
In potu, cibo et vestibus
Atque virtute, moribus.

16. Tuis devotis famulis,

Praesto, mi pater, subveni,
Ut precibus continuis
Sint tuo amore fervidi.

17. Tu moniales vigiles
Devotas fac et humiles,
Ut te devotae, sedulae
Tecum laudent, Benedicte.

18. Quaero, o pater inclite,
Benedicte dulcissime,
Ipsas devotas protege
Ab omni malo et crimine.

19. O lux mandi et speculum,
Benedicte sanctissime,
Ora pro nobis Dominum,
Lumen sanctae ecclesiae.

20. Gloria patri Domino
Et Benedicto monacho,
Qui cum Mariae filio
Semper regnat cum gaudio.