139. De s. Bernardo Claraevallensi.

1. Beata illa patria,

Ubi plena sunt gaudia,
Ubi gaudent felicia
Sanctorum contubernia.

2. Egressi cum victoria
Gloriantur in gloria,
Exempti a miseria
In pace stant perpetua.

3. Regni ludens in solio
Sancta gaudet communio,
Ubi pater in filio
Fulget, ut sol in lilio.

4. Noster ibi ex vasculo
Pleno bibit in poculo
Bernardus ; quod in saeculo
Sitivit, videt oculo.

5. Adest ibi angelicus
Et ordo apostolicus,
Confessor cum martyribus,
Uterque cum virginibus.

6. Regis summi suavissimus
Cibat omnes intuitus ;
Bernardus hic prae omnibus
Refulget ut carbunculus.

7. Dum pausas hic, sanctissime,
Salutem poscas animae,
Vide causam miseriae
Sanctae matris eeclesiae,

8. Ut corporis et animae
Tota salva compagine
Dei simus essentiae
Participes et gloriae.

9. Summi patris hoc filius
Praestet et hoc paraclitus,
Cum quibus gaudet plenius
Bernardus, Dei famulus.