162. In translatione Capitis s. Clementis.

Hymnus Rostangni, monachi Cluniacensis.

1. Caerula freti iubilant,

Nam cum Paulo participant
Munus, quod humus obtulit,
Sed theum flatum addidit.

2. Iam mare glebam retinet,
Anima caelum possidet ;
In altis Clemens residet,
Ubi rex regum praesidet.

3. Et, ut martyr dividitur,
Ita et mare scinditur,
Silet nec flare praevalet,
Dum laos festum celebret.

4. Mausoleo marmoreo,
Praeparato a Domino,
Puer sopore annuo
Dormivit sine taedio.

5. Hic martyr in exsilio
Usus agni consilio
Aquas traxit in fluvio
De sicco terrae gremio.

6. Christi legis peritia
Refulsit in ecclesia,
Quam tradente apostolo
Donavit Dionysio,

7. Sprevit decreta principum;
Ob hoc passus exsilium,
Sed per maris supplicium
Consecutus est bravium.

8. Cluniace, tripudia,

Nam Clementis clementia
Adest tibi propitia
Pro capitis praesentia.

9. Oculus, Deus, hagios,
Pius pie exaudi nos,
Et per Clementis merita
Vita detur politica,

10. Ubi laetantur angeli
Pro triumpho martyrii,
Caelestis gaudet curia
Pro martyris victoria.

11. Nunc ergo nobis miseris
Merita prosint martyris,
Ut de mundi naufragio
In caeli ducant solio.

12. O Clemens clementissime,
Fac ut possimus vivere
Tecum in illa requie,
Ubi regnat rex gloriae

13. Cum patre et sancto spiritu,
Qui nos redemit obitu.