176. De sancto Domnino.

Ad Laudes.

1. Plebs Burgi, sancti militis
Domnini, cleri flamines,
Cantate nunc miracula
Et facta sancti martyris.

2. Nam Deus est mirabilis
In sanctis suis omnibus ;
Sic David refert pagina
Sancto prolata spiritu.

3. Sit benedictusque Deus
Virtutem dans et robora
Subiecto sibi populo,
Dum pandit haec miracula.

4. Nam viro quodam tempore,
Sancti Domnini ut posceret
Salutis beneficium,
Equus ablatus redditur.

5. Pons erat quoque ligneus
Sustirionis fluvii
Pressus virorum pondere,
Solutis lignis cecidit;

6. Ex quibus nullus periit
Saevae necis discrimine
Salvatus Dei dextera
Per huius sancti merita.

7. In quibus quaedam mulier
Fecunda ponte decidit
Nullum passa periculum
Se cunctisque stupentibus

8. De sanitatis ipsius
Collato beneficio,
De inventione corporis
Sancti Domnini martyris.

9. Per huius sancti munera
Pia fiunt miracula,
Huius Burgi nam spatio
Curantur epileptici.

1(7. De sancta Dorothea.

1. Gens fidelis iucundetur,
In hac die gratuletur,
Dorotheam veneretur
Dulci cordis modulo.

2. Idolorum nam cultores
Christo reddit et errores
Sternit remittendo flores
Caelestes Theophilo.

3. Virgo prudens vigilavit
Et cum sponso subintravit,
Nam sagaciter ornavit
Lampadem cum oleo.

4. Semetipsam abnegavit

Christum sequens, quem amavit,
Crucem tollens stolam lavit
In tormenti dolio.

5. Sic vestitur dupla veste:
Alba, castitate teste,
Rubra, passionis peste,
Iuncto diademate.

6. Palmam manu fert victricem
Digne sequens adiutricem
Nostram, Christi genetricem,
Virginali schemate.

7. O casta generatio.
Precamur, ut oratio
Per te in beneplacito
Sit Christi patris more,

8. Ut caelesti nos fecundet
Rore, foris, intus mundet,
Sancti spiritus inundet
Corda nostra dulcore.

9. Praesta, pater atque nate,
Confer, spiritus beate,
Amborum nexus, ordinate
Cuncta regens saecula.