201. De s. Gebehardo Constantiensi.

Ad Vesperas.

1. Plebs rumpe cordis nubila
Et voce clara iubila
Et cole iam insignia
Gebehardi sollemnia,
Quem Deus ab infantia
Sua perfudit gratia,
De qua plura remedia
Confert suis in mania.

2. Qui fabricam Constantiae
Recusavit mirifice
Et in columbae specie
Dignatus est ostendere
Locum eius sepulturae,
Ubi fulget clarissime
Velut fulgor galaxiae
In loco eius fabricae.

3. Tu, praesul regis superni
Et splendor aulae Olympi,
Ne demergamur, subveni,
A procella huius mundi ;
Qui caput beatissimi
Pontificis Gregorii
Agiliter deduxisti
Scindensque flumina Padi.

4. Praesul, summus opilio
De carnis iam ergastulo
Te eduxit cum iubilo,
Te laudamus cum cantico,
Ut mereamur cum ipso,
Cuius regnum principio
Caret atque exitio,
Regnare sine termino.

5. Athleta, ab hostis morsu
Defende nos et a lapsu,
Ne nos pro nostro reatu
Deducat secum cum luctu,
Sed nos in mortis procinctu
Defende ab hostis metu
Et nos tecum laeto vultu
Deduc in polum cum plausu.