202. De sancta Genovefa.

1. Virgo spectandae, Genovefa, formae,
Quae rosas dulci superas odore,
Lilium vincis niveo colore,
Sidera vultu.

2. Me. licet foedum vitiisque pressum,
Cerne, quem telis zabulus cruentis
Fixit, heu morti ; vereor propinquam
Iudicis iram.

3. Incolo vallem tenebrarum et umbras
Nec queo rectum reperire callem ;
Cerei, virgo, fer opem, precamur,
Luce serena.

4. Hic tuis quondam manibus reluxit
Angelo vivam referente flammam,
Nec Noto extingui potuit nec undis
Nocte sub atra.

5. Perge spinosas removere curas,
Noxios ex me pariter calores,
Sordibus plenum sanieque pectus
Flumine purga.

6. Tolle ventosos penitus tumores
Et famem sacram rutili metalli,
Quaeque pervertunt agitantque mentem,
Cetera monstra.

7. Clara me virtus decoret lapillis,
Instar ut stellae radians coruscae
Terream saevum metuendus hostem
Lumine tanto.

8. Me per anfractus comitere, virgo,
Aequoris vasti madidumque lembum
Dirige, ut tandem valeam tenere
Litora caeli.