214. Hymnus sancti Hilarii de Christo.

1. Hymnum dicat turba fratrum,

hymnum cantus personet,

Christo regi concinnantes

laudem demus debitam.

2. Tu Dei de corde verbum,

tu via, tu veritas,

Iesse virga tu vocaris,

te leonem legimus.

3. Dextra patris, mons et agnus,

angularis tu lapis,

Sponsus idem vel columba,

flamma, pastor, ianua.

4. In prophetis inveniris

nostro natus saeculo,

Ante saecla tu fuisti

factor primi saeculi.

5. Factor caeli, terrae factor,

congregator tu maris,

Omniumque tu creator,

quae pater nasci iubet.

6. Virginis receptus membris

Gabrielis nuntio,

Crescit alvus prole sancta;

nos monemur credere

7. Rem novam nec ante visam,

virginem puerperam.

Tunc magi stellam secuti

primi adorant parvulum,

8. Offerentes tus et aurum

digna regi munera.

Mox Herodi nuntiatum est;

invidens potentiae

9. Tum iubet parvos necari,

turbam fecit martyrum.

Fertur infans occulendus,

Nili flumen quo fluit,

10. Qui refertur post Herodem

nutriendus Nazareth.

Multa parvus, multa adultus

signa fecit caelitus,

11. Quae latent et quae leguntur

coram multis testibus ;

Praedicans caeleste regnum

dicta factis approbat

12. Debiles facit vigere,

caecos luce illuminat,

Verbis purgat leprae morbum,

mortuos resuscitat.

18. Pane quino, pisce bino

quinque pascit milia

Et refert fragmenta cenae

ter quaternis corbibus;

14. Turba ex omni discumbente

iugem laudem pertulit.

Duodecim viros probavit,

per quos vita discitur,

15. Ex quis unus invenitur

Christi Iudas traditor;

Instruuntur missi ab Anna

proditoris osculo.

16. Innocens captus tenetur

nec repugnans ducitur,

Sistitur, falsis grassatur

offerendus Pontio.

17. Discutit obiecta praeses,

nullum crimen invenit.

Sed, cum turba Iudaeorum

pro salute Caesaris

18. Dicerent Christum necandum,

turbis sanctus traditur ;

Impiis verbis grassatur,

sputa, flagra sustinet.

19. Scandere crucem iubetur

innocens pro noxiis ;

Morte carnis, quam gerebat,

mortem vincit omnium.

20. Tum Deum clamore magno

patrem pendens invocat ;

Mors secuta membra Christi

laxat stricta vincula.

21. Vela templi scissa pandunt,

nox obscurat saeculum;

Excitantur de sepulcris

dudum clausa corpora.

22. Affuit Joseph beatus,

corpus mirra perlitum

Linteo rudi ligatum

cum dolore condidit.

23. Milites servare corpus

Annas princeps praecipit,

Ut videret, si probaret

Christus, quod spoponderat ;

24. Angelum Dei trementes

veste amictum candida,

Qui candore claritatis

vellus vicit sericum ;

25. Demovet saxum sepulcro,

Surgit Christus integer.

Haec videt ludaea, mendax

haec negat, cum viderit.

26. Feminae primum monentur

salvatorem vivere,

Quas salutat ipse maestas,

complet tristes gaudio ;

27. Seque a mortuis paterna

suscitatum dextera

Tertia die redisse

nuntiat apostolis.

28. Mox videtur a beatis,

quos probavit, fratribus ;

Quod redisset, ambigentes,

intrat clausis ianuis.

29. Dat docens praecepta legis,

dat divinum spiritum,

Spiritum Dei perfectum,

trinitatis vinculum.

30. Praecipit totum per orbem

baptizari credulos ;

Nomen patris invocantes,

confitentes filium,

31. Mystica fide revelat

tinctos sancto spiritu,

Fonte tinctos, innovatos,

filios factos Dei.

32. Ante lucem, turba fratrum,

concinnemus gloriam,

Qua docemur nos futuros

sempiterno saeculo.

33. Galli cantus, galli plausus

proximum sentit diem ;

Nos cantantes et precantes,

quae futura, credimus.

34. Immensamque maiestatem

concinnemus iugiter,

Ante lucem nuntiemus

Christum regem saeculo.

AdminBookmark