229. In s. Iohannis Baptistae Apparitione.

1. Christi praeconis veneremur diem
Nos in hoc templo sibi consecrato,
Consona voce pariter canendo
Laudes dicamus.

2. Hodie namque Domini baptista
Per Dei iussum venit in hunc locum
Atque praecepit domum consecrari
Nomini suo.

3. Rusticus quidam, dum hic esset solus,
Cum suo rastro terram pervertebat ;
Subito malus spiritus accedens
Illum vocavit.

i. Argenti cuppam manibus gestabat,
Ipsum clamando multa promittebat
Dicens: Huc veni et te donis multis
Valde ditabo.

5. Mox egens ipse tentus paupertate
Ire volebat, sed timebat amnem;
Nam si profundo teneretur aquae,
Vitam finiret.

6. Sanctus repente Domini baptista
Cito festinans illum liberavit
Ac suo iussu spiritum malignum
Mersit in unda.

7. Ilico Christi Domini praecursor
Rusticum clero Pontis-curvi misit,
Ut sibi templum facere festinet
Illo in loco.

8. Quibus auditis gaudio repletus
Clerus et omnis populus in unum
Domum praefatam digne construxerunt
Sancto Iohanni.

9. Gloriam trino resonemus Deo,
Qui talem nobis tribuit patronum,
Ut suam largam veniam det nobis
Nunc et in saeclum.