232. Symbolum fidei rhythmicam.

1. Altus auctor omnium,
Sator summus saeculorum,
Legum lator, largus dator,
Ab omnibus adorandus ;
Adonai omnipotens,
Qui mensus es manu aquas
Et caelum palmo contines
Terramque pugno concludis.

2. Bonus factor, bona valde
Condidisti cuncta celeriter;
Quae singula sunt nam bona,
Simul omnia satis bona;
Benedico te, rex aeterne,
Qui fecisti per verbum tuum
Ima et summa universa
Quique regis cuncta, Deus.

3. Cum esset Dei unicus
Natus natura, non dono,
Factus hominis filius
Plenus gratia per donum ;
Cum virginali in utero
Coepit esse Christus homo,
Non aliud esse coepit
Homo coeptus, quam Dei natus.

4. Dei patris unigenitus
Est matri primogenitus,
Idem ipse utrumque,
Ex utroque unus Christus.
Deus pater donat nato
Nomen altum super cuncta,
Dat hoc verbo per gratiam,
Sed corpori deificato.

5. Ego sum sine principio,
Qui sum sine fine, Deus,
Ipse unus substantia,
Qui in tribus subsistimus.
Ex corde patris genitus
Summa sapientia filius ;
Procedebat paracletus
Ex ambobus indivisus.

6. Fidei nostrae fundamentum
Christus Iesus crucifixus,
De summo patris ima petens,
Ut nos ad alta revocaret.
Fundamentum hoc habentes
In supernis satis altum
Illuc mente ascendamus,
Ubi dextra Dei patris est.

7. Gignendo pater appellatus
Prolem ex se prodit almum,
Cuius ante omne tempus
Una et par est maiestas.

G . . . . . . . .

. . . . . . . .

. . . . . . . .
. . . . . . . .

8. Homo Christus humanatus
De spiritu et virgine
Dei patris esse prolis
Non sancti spiritus creditur;
Homo ex aqua renatus
Natus aquae non dicitur,
Sed Dei patris esse prolis
Et matris ecclesiae.

9. Idem virginis filius,
Idem qui Dei est filius,
Sine defectu alterius
Utrumque unus Iesus.
Ipse Christus carne natus,
Ut ceteri cuncti nati,
In natura, non peccato,
Sine crimine castus natus.

10. Kaput nostrum Christus Deus,
Nosque omnes eius membra,
Si capiti concordantes
Spiritus nos Christo iungit.
Kaput nostrum cum corpore
Unus Christus est effectus;
Quanto magis mediator
Iesus Deus unus Christus !

11. Laetare, virgo Maria,
Laetare in tuo filio ;
Laetemurque omnes in eo
Qui nasci dignatus ex ea.
Laudabatur ab angelis,
A pastoribus inspicitur,
A Magis Christus quaeritur,
Et a stella demonstratur.

12. Maria virgo vera habetur ;
Dei genetrix dicitur ;
Verbum enim caro factum
Non in carnem conversum est.
Mariae gremium germinavit,
Genuit Deum et hominem,
Verum corpus et animam,
Ut homo totus sit redemptus.

13. Nunc commune deitatis
Deus nomen trinitatis,
In quo unicus benedictus
Venit et sanctus spiritus ;
Nunquam pater omnipotens
In hoc esse adprobatur,
Quia Deum coaequalem
Genuit natura filium.

14. Omnipotens verbum patris
Virtusque et voluntas
Caeli terrae cuncta implet
Suae deitatis potentia.
Omnia data a Deo patre
Humanitati eius vere,
Sedis paternae confessio
Et angelorum officium.

15. Passus est princeps regum,
Cuius pater passus non est
Nec Procedens passus unquam ;
Christus solus carne passus.
Primogenitus ex mortuis
Per sanguinem sibi cuncta,
Quae in caelo et in terra,
Sancta pace sociavit.

16. Quem ante saecula credimus
Patris natum sine matre,
Ipsum quoque in eius fine
Matre natum sine patre.
Qui nec unione est confusus,
Nec distinctione geminatus,
Idem semper homo Deus,
Ipse Deus homo verus.

17. Resurgens sed a mortuis
Mortis destruxit imperium,
Solvens vincla mancipatos
Ut reducens regno Dei.
Redemit nos rerum factor
Magno pretio mirifice
Cum sacro suo sanguine,
Non metallis mortalibus.

18. Spiritus sanctus, paracletus,
Consolator, advocatus,
Est cum patre et filio
Noster factor et redem[ptor].
Sancti spiritus processio
Ita, ut filii nativit[as],
Latet cunctas creat[uras]
Et antecellit unive[rsa].

19. Ter cum Deum dicimus,
Non tres Deos credimus,
Sed unum invisibilem
In maiestatis gloria.
Ternis in his personis
Trinitatem credimus ;
Patrem, Verbum, Proceden[tem]
Uno laudemus carmine.

20. Unus Deus est nam pater,
Unicus Deus est filius,
Unicus Deus est spiritus ;
Hoc unitas trinitatis.
Uerus pater, qui genuit,
Uerus filius, qui genitus,
Uerus procedens spiritus ;
Hoc trinitas unitatis.

21. Xristo in cruce corona[to]
Fel ad escam deder[unt]
Sitim potabant aceto ;
Vae tibi gens miser[a] !
Xristus e caelo veniens,
Scilicet, ut carne praes[ens]
Excelsus iudicet o[mnes],
Et reseret pectora,

22. Ymnum dicat ord[o omnis],
Fidelis qui inve[nitur],
Patri, Nato, Pare[cleto],
Gloriosae trinitati.
[Ymnum] dicamus Dei nato,
[Qui ab a]rce alta caeli
[Indut]us venit corpore,
[Ut salva]ret nos vitales.

23. [Zelum Dei] sic habentes,
[Non] inanes obloquentes,
[Abs]que serpentis sibilo
[Simus] Deum adorantes.
[Z . . . .]no, omittentes
[Falsa] draconis ubera,
[Aquas] vitae hauriamus
[De fon]tibus salvatoris.

24. [Gloria] tibi, trinitas ;
[P atri], Filio, Procedenti
[Una e]ademque indivisa
[Virtus, h]onor et gloria.
[Gloria] tibi, Iesu bone,
[Qui nat]uram nostrae carnis
[Tuae] deitati adunasti,
[Ut nos] in te gloriemur.