246. De sancta Katherina.

Ad Nocturnas.

1. Pange, lingua, gloriosae
Virginis martyrium,

Gemmae iubar pretiosae
Descendat in medium,

Ut illustret tenebrosae
Mentis domicilium.

2. Virgo poenis iam attrita

Rotarum patibulo
Praesentatur praemunita

Fidei signaculo ;
Genu flectit, orat ita

Circumstante populo:

3. "Ut confirmes spem tuorum
Et honorem nominis
Et elidas superborum

Vim virtute numinis,
Struem, Deus, hanc lignorum
Ictu frange fulminis".

4. Vox completur, mox iunctura

Rotarum dissolvitur ;

Astans molis ex pressura

Populi pars teritur,
Pars baptismum susceptura
Virgini coniungitur.

5. Fide fidens oculata
Regis uxor emicat,

Dcos regis exprobrata
Christi fidem praedicat,

Fortis mammis cruciata
Spe constanti dimicat.

6. Decollari cum iubetur,
Caput offert gladio,

Petit, sibi suffragetur
Virginis oratio,

Ex defectu ne fraudetur
Palmae suae praemio,

7. Huius et nos imploremus
Devote suffragia,
Mentes ita confirmemus

Katherinae gratia,

Ut reginae conregnemus

In caelesti patria.