249. De sancta Katharina.

Ad Nocturnas et Laudes.

1. Eia, fidelis contio,
Prome sollemni gaudio
Praeclara de victoria
Katharinae sollemnia.

2. Haec utraque divinitus
Docta sophia penitus
Oratorum sententiam
Mutat ad Christi gloriam.

3. Laeto coronae conscia
Corde tendens ad fortia
Saevo mactato verbere
Iesum fatetur libere.

4. Gaudens reclusa carcere
Iesum meretur cernere
Cum sacratis virginibus
Iam Christo conregnantibus.

5. Torquetur, sed non laeditur,
Poena rotarum frangitur,
Cadunt incredibilia
Bis duo caesa milia.

6. Ad decollandum ducitur
Nec terrore concutitur,
Quae cernens Dei filium
Gaudens exspectat gladium.

7. In terra flexis genibus
Orat pro se colentibus ;
Quod petivit, obtinuit,
Dum morte vitam meruit.

8. Unda lactis pro sanguine
Manat de caesa virgine,
Ab angelis mirifice
Fertur in Sina vertice.

9. Res miranda, virgineum
Corpus redundat oleum
Ad medelam languentium
Te, Christe, confitentium.

10. Virgo, maityr egregia,
Stirpe concepta regia,
Rosam ferens cum lilio,
Conregnans Dei filio,

11. Ut te videre liceat
Et nobis tecum luceat
Lux iugis et aeternitas,
Praestet beata trinitas.