250. De sancta Katharina.

1. Gaude, Sion, mater sancta,
Hymnum novum Deo canta
Propter ineffabilia,
Quae facit, mirabilia.

2. Fulgent haec in Katherina,
Quam sic gratia divina
Vultu fecit elegantem,
Sed fide magis vernantem.

3. Imperator Maxentius
Virgis ferreis acrius
Iubet illam lacerari
Et plagosam decollari.

4. Ensis dat lac, non cruorem,
Virginalem ad decorem ;
Ab angelis deportatur,
In monte Sina humatur.

5. Ubi nunc ad laudem Dei
Liquor distillat olei,
Cuius aegri tacti rore
Omni curantur languore.

6. Sponsus, sponsas qui coronat,
Katherinae large donat
Inter rosas et lilia
Aromatum cubilia.

7. Huius prece, Christe, serva
In tuorum nos caterva,
Qui cum patre et flamine
Regnas Deus sine fine.