251. De sancta Katharina.

1. Ad Katherinae nuptias,

Pincerna quarum Christus est,
Novas ferentes lampades
Sacrae venite virgines.

2. In virginali corpore
Sponsi sui fert stigmata
Et facta pinguis hostia
Tormenta cassat omnia.

3. In carceris caligine

Templum Dei dum clauditur,
Caeleste lumen emicat
Et noctis umbras effugat.

4. Advenit et deifica
In carcerem praesentia,
Agonithetam visitans
Et ad palaestram roborans,

5. O virgo, sole clarior,

Confringe nostrum carcerem,
Cuius nos gravat caecitas
Lutique densi foeditas.

6. Tu nos laves a sordibus,
Levet beata trinitas
Post festa transitoria
Ad angelorum gaudia.