244. In sancti Comgilli.

R. Recordemur iustitiae Nostri patroni fulgidae,
Comgilli, sancti nomine, Refulgentis in opere,
Adiuti Dei flamine Sancto claroque lumine
Trinitatis celsissimae, Cuncta tenentis regmine,

Quem Deus ad aetherea

Conduxit habitacula,

Ab angelis custodita,

Permansura in saecula.

1. Audite, AdminBookmark

Adlati ad angelica
Athletae Dei abdita,
A iuventute florida
Aucta in legis pagina,
Alta sancti per viscera,
Apta fide, iustitia,
Ad Dei ducta gaudia.

2. Bonam vitam, iustitiam,
Benignitatem floridam,
Caritatem firmissimam,
Deo primo adhibitam
Iuxta mandatum, solidam,
In regno praestantissimam,
Proximis saepe deditam
Efficiebat cognitam.

3. Contemptum mundialium
Voluptatum praesentium,
Vitiorum firmissimum
Infirmos devastantium,
Verborum, cogitaminum
Parte laeva versantium
Continebat per viscerum
Secreta vigilantium.

4. Doctus in Dei legibus
Divinis dictionibus,
Ditatus sanctis opibus
Deo semper placentibus,
Dedicatus in moribus,
Dei stefanus hagius,
Docebat sic et ceteros
Dicta docta operibus.

5. Elegit a primordio,
Quod erat in principio,
Aeternum Verbum, paterno
Eructatum sanctissimo
Corde verum altissimo,
Carus eidem lucido
Pignus praeclaro animo,
Constans opere placido.

6. Fulgebat alti fulgore
Solis vice, in vertice
Rutilantis meridie,
Fidei claritudine,
Confirmatus ex viscere
In Deo semper fidere,
Confidens sanctimoniae
Praecipuo munimine.

7. Gaudium sancti spiritus
Habebat in visceribus,
Regnum quod est sublimibus
Deo dignum, et fortius
Gladium quoque spiritus
Levatum ad nequissimos,
Quo prosterneret superbos,
Tenens sanctis in manibus.

8. Humilis, sanctus, benignus,
Probus in Dei legibus,
Humanus, iustus, commodus,
Laudabilis in moribus,
Hilaris vultu, sobrius
Caritatis in floribus,
Decoratus ordinibus
Factus palam mortalibus.

9. In scripturis eruditus,
Inspiratus divinitus,
In sacramentis providus
Canonicis adfatibus,
Veteris novi actibus
Testamenti praefulgidus,
Fervens spiritu, placidus,
Deo carus et piissimus.

10. Kalcavit mundum subdolum
Raritatis per studium,
Kastitatis firmissimum,
Kontemnens omne vitium,
Inserens agrum floridum,
Pectus adornans lucidum,
Divinum habitaculum,
Trino nomine sancitum.

11. Lampadem sapientiae
Constituit in pectore,
In thesauro scientiae
Condito Dei munere,
Inflammatus magnopere
Luce verae iustitiae,
Exaltatus munimine
Legis, spiritus litterae.

12. Magnum apprendit bradium
Aeterna vita condignum
Adeptus sanctum praemium
Post laborem firmissimum,
Cuius perfectum meritum
Vocamus in auxilium,
Ut mereamur omnium
Vitiorum excidium.

13. Notus sanctorum coetibus,
Abbatum in ordinibus,
Monachorum militibus,
Anchoretarum sensibus,
Synodum sanctis plebibus,
Immo vir apostolicus,
Clarus sanctis in sortibus,
Adauctus in sublimibus.

14. O petram solidissimam
In fundamento positam,
O contemptorem omnium
Rerum nequam praesentium,
O ducem sanctum militum
Domino militantium,
O tyronem fortissimum
Domino totum deditum !

15. Positus muri ferrei
Vice in luce populi
Dissipare, disperdere
Cuncta mala destruere,
Aedificare, plantare
Bona tota in commune
More sancti Ieremiae
Constituti in culmine.

16. Quis contempsit praesentia
Huius aevi decidua?
Quis ascendit ad superna
Toto animo gaudia?
Quis volebat in aethera
Carne volare posita,
Qualiter iste talia
Adeptus sancta merita?

17. Rexit sanctam ecclesiam
Catholicam per regulam
Retinens fidem solidam
Malam contra nequitiam,
Suam exercens animam
Sanctae legis per paginam,
Cuius exopto gratiam,
Mihi adornet animam.

18. Sapiens suos internos
Sanctos elevans oculos
Deducebat ad superos
Capite sancto intentos,
Parte sancta in dextera
Collocans sua viscera,
Centurionis opera
Habens sancta per studia.

19, Tulit suam memoriam
Ad mansionem supernam,
Caram Deo et floridam
Suam exercens animam,
Contemnens terram subdolam,
Vanam omnem insaniam
Domans, iens cum Abraham
Ad terram illam optimam.

20. Uitam aeternam fulgida
Adeptus est sub corona,
Ubi assumet praemia
Permansura in saecula
Comitaturus agmina
Angelorum praecipua,
Inquirens semper talia,
Vigilans in ecclesia.

21. Xristum orabat magistrum
Summum ornans obsequium,
Christi gerens officium
Actum per apostolicum,
Huius sequens vestigium,
Ducens Deo exercitum
In sanctum habitaculum
Trinitatis lectissimum.

22. Ymnum Deo cum cantico
Immolabat altissimo
Diei noctis circulo
Orans saepe cum triumpho.
Nunc cantabit sub numero
Canticum novum Domino
Iunctus choro angelico
Summo sanctus in iubilo.

23. Zona cinctus iustitiae,
Castitatis eximiae
Munda opertus sindone,
In signo castinioniae
Feminalia lucidae
Habens ex toto viscere,
Cuius sancto pro opere
Reddetur merces condigne.