259. De sancta Kunegunde.

Ad Vesperas.

1. Summi patris potentia
per multa miracula

Patet nobis cotidie,
per dona clementiae

Salvatoris altissimi
hoc in mundo labili.

2. Kunegundis eximia
benedicta et Maria

Parili castissimo
veroque conubio

Conectuntur: haec Heinrico,
illa Ioseph inclito.

3. Imperatrix nequissimae
per causas invidiae

Fraudulenter arguitur,
sed minime vincitur

Per vomeres non laeditur
candentes nec uritur.

4. Mundum linquens post decessum
Caesaris sanctissimum,

Regulari vita degens,

canens, orans sive legens,

Sic mercedem congregavit
miraculis quam monstravit.

5. Hanc fideles in saeculo
nunc honorent merito,

Per eius suffragia
dentur his subsidia

Dirae mortis articulo
virginis a filio.

6. Laus patri sit ingenito,
virtus unigenito,
Sancto simul paraclito,
qui lucet in praemio
Gaudia dans fideliter
iustis et perenniter.