250. In sanctae Monennae.

R. Deum, deorum Dominum,

Regem et sponsum virginum,

Sempiternum, infinitum,

Invocemus praevalidum ;

Sanctae Monennae meritum

Et nos ducat post obitum

In regni refrigerium,

Quam tu, Christe perpetua

Collocasti in gloria.

1. Audite sancta studia

Virginum Christi milia,

Sanctae Monennae plurima,

Sana, summa, salubria,

Quam perrexit industria

Donante Christi gratia.

2. Benedicta Patricio

Sub virginali pallio

Consecraverat Domino

Templum cordis hospitio,

Christo digna possessio.

3. Corde perfecta, sobria,

Sponsa Deo dignissima,

Vestimenta pulcherrima

Habuit nuptialia,

Quibus induta regina

Regis stetit in dextera.

4. Donavit illi maximam

Deus virtutum gratiam:

Certam, veram, propheticam

Futurorum scientiam,

In omni coetu gloriam,

De adversis victoriam.

5. Erat illi mirabile

De aqua vinum facere,

Petram in sal efficere;

Temptata filiis satanae

Semper ditata munere

Visionis angelicae.

6. Fertur Monennae vitulus

Raptus a lupis protinus,

Egit noctem miserrimus

Inter lupos, fit pavidus ;

Illa orante citius

Sanus a bestiis redditus.

7. Gloriosum miraculum

Divulgatum per populum:

Unum occidit vitulum

Servis Dei convivium,

Fecit Monennae meritum

Vivum haberi iterum.

8. Humilis erat animo,

Excelsa tamen merito,

Terram arabat sarculo

Eremitarum studio,

Virum gerens proposito

In corpore femineo.

9. Ieiunii in rigore,

In caritatis ardore,

In omni bono labore

Propter Dominum propere,

Sic vixit omni tempore

Crucifixo iam corpore.

10. Kasta, electa columba,

Perfecta, matri unita,

Turtur erat castissima

Voce sonante cognita,

Vitis vera, florigera,

Christo Domino condigna.

11. Lucerna erat lucida

In templo Dei posita,

Virga Iesse florida,

Pulchra, fortis et unica,

Margarita pulcherrima,

Ornata, regi placita.

12. Magnam struxit ecclesiam

In desertis egregiam,

In qua virtute maxima

Fecit laude dignissima;

Defunctam unam filiam

Suscitavit emortuam.

13. Narrant item de vasculo

Mirum dictu argenteo,

Magno immisso fluvio

Longo terrarum spatio ;

Monennae nutu superno

Transmissum est a Domino.

14. O Christi sanctam virginem,

Mariae imitatricem !

O verae vitis palmitem,

Cum omni fructu arborem !

O regis sponsam sublimem,

Deo semper amabilem !

15. Patriarcharum sinibus

Cum electis virginibus,

Apostolorum coetibus

Solis luce fulgentibus,

Sublimata honoribus

Sanctorum his similibus.

16. Quantum crucem sustinuit,

Tantum corde congaudebit;

Quantum Domino placuit,

Tantum signa promeruit ;

Quantum Deo oboedivit,

Tantum praemium accepit.

17. Regno caelorum fruitur,

Viro Dei reficitur,

Coelesti manna alitur,

In paradiso pascitur,

In quo a sanctis canitur

Carmen, quod nunquam finitur.

18. Stola induta gloriae,

Spe secura victoriae

Sponsum sequitur ubique

In caeli latitudine,

Electorum in ordine

Refulget solis splendore.

19. Transacta nocte media,

Voce clamante superna,

Cum lampade praelucida

Sponso occurrit obvia,

Prudens, edocta filia,

Sponsi transit ad gaudia.

20. Urbem intravit supernam,

Caelestem Ierosolymam,

Sortita vestem candidam

In modum solis splendidam,

Post perfectam victoriam

Habet laudem et gloriam.

21. Xristo sedet in dextera

Una cum sancta Maria,

Summa habentes gaudia

Trinitatis in gloria

Milium inter milia

Angelorum sublimia,

22. Ymnum Deo infinitum

Canentes regi omnium,

Laudantes in perpetuum

Summum eius imperium

Consona voce carminum

Electorum sublimium.

23. Zona Christi durissima

Praecinxit sancta viscera,

Qua perfecta deposita

Vestitur stola byssina

Inter sanctorum agmina

Saeculorum in saecula.