252. In sancti Patricii, magistri Scotorum.

Hymnus sancti Secundini.

1. Audite, omnes amantes

Deum, sancta merita
Viri in Christo beati,

Patricii episcopi,
Quomodo bonum ob actum

similatur angelis
Perfectamque propter vitam

aequatur apostolis.

2. Beata Christi custodit

mandata in omnibus,
Cuius opera refulgent

clara inter homines,
Sanctumque cuius sequuntur

exemplum mirificum,
Unde et in caelis patrem

magnificant Dominum.

3. Constans in Dei timore

et fide immobilis,
Super quem aedificatur,

ut Petrus, ecclesia,
Cuiusque apostolatum

a Deo sortitus est,
In cuius portae adversum

inferni non praevalent.

4. Dominus illum elegit,

ut doceret barbaras
Nationes et piscaret

per doctrinae retia,
Et de saeculo credentes

traheret ad gratiam,
Dominum qui sequerentur

sedem ad aetheream.

5. Electa Christi talenta

vendit evangelica,
Quae Hibernas inter gentes

cum usuris exigit,
Navigii huius laboris

tum operae pretium
Cum Christo regni caelestis

possessurus gaudium.

6. Fidelis Dei minister

insignisque nuntius
Apostolicum exemplum

formamque praebet bonis,
Qui tam verbis quam et factis

plebi praedicat Dei,
Ut, quem dictis non convertit,

actu provocet bono.

7. Gloriam habet cum Christo,

honorem in saeculo.
Qui ab omnibus ut Dei

veneratur angelus,
Quem Deus misit ut Paulum

ad gentes apostolum,
Ut hominibus ducatum

praeberet regno Dei.

8. Humilis Dei ob metum

spiritu et corpore,
Super quem bonum ob actum

requiescit Dominus,
Cuiusque iusta in carne

Christi portat stigmata
Et cuius sola sustentans

gloriatur in cruce.

9. Impiger credentes pascit

dapibus caelestibus,
Ne. qui videntur cum Christo,

in via deficiant ;
Quibus erogat ut panes

verba evangelica,
Et cuius multiplicantur

ut manna in manibus.

10. Hastam qui custodit carnem

ob amorem Domini,
Quam carnem templum paravit

sanctoque spiritui,
A quo constanter cum mundis

possidetur actibus,
Quam ut hostiam placentem

vivam offert Domino.

11. Lumenque mundi accensum

ingens evangelicum,
In candelabro levatum,

toto fulgens saeculo,
Civitas regis munita,

supra montem posita,
Copia in qua est multa,

quam Dominas possidet.

12. Maximus namque in regno

caelorum vocabitur,
Qui, quod verbis docet sacris,

factis adimplet bonis ;
Bono praecedit exemplo

formaque fidelium,
Mundoque in corde habet

ad Deum fiduciam.

13. Nomen Domini audenter

adnuntiat gentibus,
Quibus lavacri salutis

aeternam dat gratiam,
Pro quorum orat delictis

ad Deum cotidie,
Pro quibus ut Deo dignas

immolatque hostias.

14. Omnem pro divina lege

mundi spernit gloriam,
Qui cuncta ad eius mensam

aestimat quisquilia,
Nec ingruenti movetur

mundi huius fulmine,
Sed in adversis laetatur,

cum pro Christo patitur.

15. Pastor bonus et fidelis

gregis evangelici,
Quem Deus Dei elegit

custodire populum
Suamque pascere plebem

divinis dogmatibus,
Pro qua ad Christi exemplum

suam tradit animam.

16. Quem pro meritis salvator

provexit pontificem,
Ut in caelesti moneret

clericos militia,
Caelestem quibus annonam

erogat cum vestibus,
Quod in divinis impletur

sacrisque adfatibus.

17. Regis nuntius invitans

credentes ad nuptias,
Qui ornatur vestimento

nuptiali indutus,
Qui caeleste haurit vinum

in vasis caelestibus
Propinansque Dei plebi

spiritale poculum.

18. Sacrum invenit thesaurum

sacro in volumine
Salvatorisque in carne

deitatem pervidet,
Quem thesaurum emit sanctis

perfectisque meritis,
Israhel vocatur huius

anima, '',videns Detum'.''

19. Testis Domini fidelis

in lege catholica,
Cuius verba sunt divinis

condita oraculis,
Ne humanae putrent carnes

esaeque a vermibus,
Sed caelesti saliantur

sapore ad victimam.

20. Uerus cultor et insignis

agri evangelici,
Cuius semina videntur

Christi evangelia,
Quae divino serit ore

in aures prudentium,
Quorumque corda ac mentes

sancto arat spiritu.

21. Xristus illum sibi legit

in terris vicarium,
Qui de gemino captivos

liberat servitio,
Plerosque de servitute

quos redemit hominum,
Innumeros de zabuli

absolvit dominio.

22. Ymnos cum apocalypsi

psalmosque cantat Dei,
Quosque ad aedificandum

Dei tractat populum,
Quam legem in trinitate

sacri credit nominis,
Tribusque personis unam

docetque substantiam.

23. Zona Domini praecinctus

diebus ac noctibus
Sine intermissione

Deum orat Dominum,
Cuius ingentis laboris

percepturus praemium
Cum apostolis regnabit

sanctus super Israhel.