286. De s. Maria Magdalena.

1. Adesto, summa pietas,
Perpetua tu claritas,
Gratissima benignitas,
Illapsa terris largitas,

2. Beata fides hominum,
Sincera spes credentium,
Caritas miserantium
Augens sensus fidelium.

3. Constas nempe ''iustitia
Virtute ''atque supera,
Fulguras ''temperantia
Redimitus prudentia.''

4. Distinctis tribus maximis
Credendo Deus crederis ;
Quattuor inde dividis
Noscendo quibus nosceris.

5. Eleganter hoc tribuis

Per sancti donum flaminis,
Repletur a quo lacrimis,
Qui rumpit ulcus pectoris.

6. Fragranti hoc solamine
Consolatur Magdalene
Elimata rubigine
Maria clementissime.

7. Gravi morbo sudaverat,
Grande scelus admiserat ;
Ultro acta commemorat,
Dolore mentis aestuat.

8. Haec, oscula vestigiis
Dum tuis fert sanctissimis,
lavatur a contagiis
Deflendo culpam criminis.

9. Iesum proclamat precibus
Iesum pulsat singultibus,
Iesum votis simplicibus,
Iesum petit gemitibus.

10. Karismatis pinguedine
Simon cassatur valide,
A peccatrice tangi te
Te reprobat muliere.

11. Labenti manum porrigis,
Faece cubantem erigis ;
"O mulier," sic loqueris,
"I, munda a colluviis."

12. Madidata continuo
Spirituali lavacro,
Exuta diabolico
Procul polluta cuneo.

13. Nexatur tibi subito,

Sanctum perimit balsamo
Caput pretiosissimo
Nardo commixto pistico.

14. Ovatizans haec attulit,
Quae sibi libens conterit ;
Hinc alabastro congerit
Ac morti tuae dedidit.

15. Placabilem tunc affore
Obsequio pedissequae
Acceleras, dulcissime,
Accelerando provide.

16. Quem suspensum patibulo
Conspiciens acerrimo
Condoluit flammineo
Succensa desiderio.

17. Repostum in sarcophago
Unguenta parens mortuo
Affectu quaerit caelico,
Dictu discat angelico:

18. "Surrexit", inquit, "Dominus
Soporatis custodibus;
Galilaea Nazareus
Cernetur a sodalibus."

19. Tum hortulanum aestimat,
Qui sata terrae seminat,
Exsiccata qui resecat,
Virida quaeque aggregat.

20. "Uade, meis dic fratribus,
Accedant ad me propius."
Ivit laeta quantocius
Profans verba ita tenus:

21. "Xristum crevi, discipuli ;
Haec intulit et haec mihi.
Professione parili
Hunc semper veneramini."

22. Ymbre roratur fertili,
Ratione probabili,
Lacrimarumque rivuli
Actu probantur habili.

23. Zizania eradica
Segete de triticea
Supplicante Magdalena,
Opitulante Maria.

24. Ave, parens ingenite,
Ave, suboles genite,
Ave, spiritus ignee,
Divae largitor gratiae.