296. De ss. Medardo et Gildardo.

Hymnus Gifardi monachi.

1. Sublime festum, valde celebrabile,
Caelitus pulchrum decoratum lumine
Versilis annis indicit christicolis;
Laudibus ergo modulemur consonis.

2. Mentibus pronis flagitamus supplices:
Avete, ciues Galliarum praesules;
Vos Deus ante mundi creationem
Praedestinavit ad supernam requiem.

3. Ortu gemellos dies una protulit,
Atque ad culmen praesulatus extulit
Proque virtute laureati pariter
Diem nativum dicastis sollemniter.

4. Sancte Medarde et Gildarde inclite,
Nostros reatus deprecatu solvite ;
Vestra doctrina refulget ecclesia,
Ut sol et luna, magna luminaria.

5. Columnae binae in statu ecclesiae,
Fide fundatos, spe robustos solide,
Fonte renatos caritatis germine,
Post mortem carnis impetrate vivere.

6. Sit trinitati sempiterna gloria,
Honor, potestas atque iubilatio,
In unitate cui manet imperium
Ex tunc et modo per aeterna saecula.