297. In sancti Mercurii Translatione.

1. Martyr Mercuri, saeculi futuri
Perpeti dona gloriae corona,
Qui tuam totis venerantur votis
Translationem.

2. Qui dudum Romae Decio dictante
Multa pro Christo passus ipso dante
In Caesarea, vir virtutis [t]antae,
Victor occumbis.

3. Quem Caesar Constans inter praecessorum
Deferens secum fines Apulorum
Praeterit intrans more tyrannorum,
Cuncta consumens.

4. Interim urbem vastat opulentam
Sambriam, iusta voce luculentam,
Cuius ruinam Deus violentam
Ita solatur.

5. Tres coenobitae gratae Deo vitae
Ista dolentes, tristes et maerentes,
Corpus beatum sibi commendatum
Humant ibidem.

6. Urbs desolata ita consolata
Super humata corporis beata
Ossa, pro rata sit ut Deo grata,
Construit templum.

7. Caesar progressus venit Beneventum,
Sed vi repressus sibi resistentem
Romam festinat, Samniam declinat
Belli potentem.

8. Post plures annos Arechis, insignis
Samniae princeps, multis motus signis
Martyris corpus laudibus condignis
Samniuni transfert,

9. Donans id ara nobili, praeclara.
Cuius precatu omni nos reatu
Pneuma beatum purget et optatum
Conferat statum.

10. Honor et virtus, regnum et potestas
Sit, Deus noster, tibi, qui sic praestas
Tuos attolli contra res infestas
Opem ferendo.