315. De s. Nicolao Tranensi.

Hymnus Francisci Cameni Perusini.

1. Sidus o caeli, Nicolae, fulgens,

Magne protector populi Tranensis,

Da, precor, vires tua concinenti

Inclita mira.

2. Helladis Graeco genitus parente

Et gregis pastor Dominum vocabas

More mystarum "Miserere" semper

"Kyrie" clamans.

3. Altius spirans ovibus relictis

Eligis specum recubantis ursae,

Quam fugas signo Dominique iussu,

Quo tremit orbis.

4. Hic senex, forma monachus verenda,

Astitit nudus tibi, canus ora

Teque confirmat monitu salubri,

Inde refugit.

5. Anxia tandem caperis iubente

Matre, percussus retineris arce,

Caelitus facto tonitru sed exis

Obice rupto.

6. Rursus in cassum cohibent catenis ;

Solveris semper manibus tonantis

Et super solis radios canoro

Tolleris ore.

7. Redditum terris scelerata furtim

Turba te vinctum mare mergit alto;

Recipit delphin laqueis dissectis

Teque reducit.

8. Mox salutarem repetens eremum

Erigis cedro crucis alma signa;

Ducis et fratrem, videt ille miram

Igne columnam.

9. Angelus transfert radians utrumque,

Tu tamen constans toleras in antro,

Quidquid excelsi monuere sancta

Dogmata Christi.

10. Hinc rapi vivus totiens mereris

Et modo spectas radiosa luco

Lucido supplex simulacra, divum

Lampade trina.

11. Hic Tranum monstrat tibi mox futurur

Nuntius caeli, titulum perennem

Usque ad extremum genus huius orbis

Aede sacrata.

12. Quot subis poenas meritis Olympi?

Immerens ictus quotiens tulisti?

Saucio tandem superi medentur

Numine summo.

13. Dum parant nautae tibi machinari

Fluctibus letum, pia virgo tutum

Vexit Hydruntum, variasque pellis

Illico pestes.

14. Ad Tarentinos gradiens cruorem,

Dive, fudisti graviter repressus,

Inde migrasti celebres Tranenses

Hospite grato.

15. Kyrie" hic tutus "miserere" clamas,

Teque sectatur puerilis aura,

Namque concentum similem rogabas

Munere pomi.

16. Pane cum lympha reficis pusillum

Corpus, indutum tunicam misellam

Et nudis semper pedibus meabas

Supplice lingua.

17. Hic adhuc spirans sitiens aquarum

Poculum poscis, bibis, at relictus

Humor est nectar, velut egit olim

Christus Iesus.

18. Quis tuas plene, Nicolae, laudes,

Mira quis posset numerare magna?

Tu crucis signo redimis loquelam,

Dive, sorori.

19. Quot tua incedunt ope claudicantes,

Quot vident orbi ! Movet expedite

Ante contractos numerosus artus

Undique supplex.

20. Daemones pellis miseris ab alvis,

Compedes multis manicasque solvis.

Naufragas puppes hiemem ferentes

Hostis et arma.

21. Dive, tranquillum mare siste nautis,

Dive, pro nostra vigiles salute,

Ut poli aetema requie fruamur

Sospite cursu.

22. Sit Deo patri decus atque nato,

Spiritum sanctum veneremur aeque;

Trinus ac unus Deus est ubique

Praepete saeclo.