317. De sancto Oswaldo Rege.

1. Festum sacrati martyris
Emeritique militis
Oswaldi, regis incliti,
Laude pangamus celebri.

2. Hic pubertatis tempore
Hausit fecundo pectore
Sacrae fluenta sophiae
Maiestatis de numine.

3. Britto quem mundo protulit,
Scotigena excoluit,
Anglus hunc regem extulit
Proprietatis fenore.

4. Regni qui culmen temperat,
Dum monitis obtemperat
Benefidi pontificis
Aydani mirificis,

5. David, en, alter viribus
Ac aequipar virtutibus,
Hostes sternens ecclesiae
Palmam tenet victoriae.

6. Huius manus largifiua
Pauperibus ac prodiga
Pontificis oraculo
Non marcet in perpetuo.

7. Demum triumpho nobili
Pedes secutus Domini,
Quam Christus in se protulit,
Mortem pro Christo pertulit.

8. O regum gemma nobilis,
Suffragio sis dapsilis,
Nobis te percolentibus
Adesto clemens omnibus.

9. Summo parenti gloria
Laus filioque maxima
Amborumque paraclito
Par sit nomen perpetuo.