330. De sancto Leonhardo.

1. O Leonharde pastor bone,
Clarum sidus rutilans,

Sacrae fidei colone
Labis chaos mutilans

Evangeliique sator
Mortis purgans lolia.

2. Infernorum spoliator
Viam lucis reserans,

Captivorum liberator

Fidem Christi praedicans,

Mundum vincens praedicator
Hosti rapis spolia.

3. Tua voce, fortis leo,

Mortuos vivificas,
Praedicando multos Deo

Perditos reaedificas,
Persequenti poenitentis

Abscondis vestigia.

4. Pigmentalis ad medelam
Nardus salutifera,

Odor suavis ad tutelam
Contra cuncta pestifera,

Removendo corruptelam
Sacra per prodigia.

5. Te rogamus, pater pie,
Leonharde, fletibus,

Praesens sis extrema die,
Sathanae de retibus

Nos absolas et a Styge
Tua cum potentia.

6. Vitiorum de sentina
Et de mortis carcere
Nos eruas, a ruina,

Reis velis parcere,
Aures precibus Inclina
Tua pro clementia.

7. Praesta, pater atque nate,

Dei sapientia,
Confer, spiritus beate,

Nexus et essentia,
Trinitas In unitate,

Ens regens viventia.