332. De sancta Restituta.

1. Restitutae collaudemus
Virginis martyrium,
Corda, manus, ora demus

In eius obsequium,
Ut cum Christo corregnemus
Per eius suffragium.

2. Restituta Romae nata
Nobili progenie,
Soli Christo dedicata

Voto pudicitiae
Mundum spernit refutata
Procorum congerie.

3. Pie Christum deprecatur

Virginis infantia,
Ne per virum corrumpatur

Sua pudicitia ;
Angelus hanc consolatur

Promittens subsidia.

4. Eius voto contristatur

Daemon, nudat gladium,

Dormienti comminatur
Trux mortis supplicium,

Virgo pavens deprecatur
Caeleste remedium.

5. Daemon fugit, illustratur
Virgo caeli lumine,

Adest Christus, ei fatur
Dulci consolamine,

Monet, ut Sora petatur
A beata virgine.

6. Dum fatetur se nescire

Virgo Sorae patriam,

Christus praecipit exire

Lateranam per viam

Hic promittens invenire

Ducem ac custodiam.

7. Sacris dictis adquiescit,

Urbs cum domo linquitur,

Humi cubans requiescit,
Ab angelo rapitur,

Dumque ferri sese nescit
Portis Sorae sistitur.

8. Sorani ducta Restituta

Angelico lumine
Non a Dei laude muta

Mandat Christi nomine,
Sit Cyrilli caro tuta

A leprae putredine.

9. Deum laudat plebs Sorana
Cognito miraculo,

Fit gentilis christiana
Fidei signaculo,

Idolorum spernit fana
Contempto periculo.

10. Sacro fonte renovata

Christiana contio
Furibundi decollata

Regis est imperio,
Quae cum sanctis coronata

Caeli regnat solio.

11. Saevus praeses admiratur
Et dolet atrocius,
Virgo illi praesentatur,

Quam adfatur blandius,
Dis ut sacret, exhortatur,
Ne plectatur gravius.

12. Fide fulta martyr Christi,
Irascentis animum

Nihil verens ait: Isti
Hospites sunt daemonum,

Quibus tecum fine tristi
Par erit supplicium.

13. Restitutam cruciari

Impius rex imperat,

Scorpionibus tractari,
Nec eam vi superat,

Nam a Christo separari
Dolore non poterat.

14. Sponsa Christi visitatur
A caeli militia,
Satiatur et sanatur

Angeli praesentia,
Baptizatur, decollatur
Carceris custodia.

15. Post haec sanctam coarctari
Rex iubet lampadibus,
Sed frigescunt, nec cremari

Se virgo scit ignibus ;
Tortor caecus se curari
Clamat sanctae precibus.

16. Tandem ergo consummari
Praecipitur gladio,

Decollatur voto pari
Cyrillus ab impio ;

Horum prece coronari
Poscimus cum gaudio.

17. Trinitati sempiterna

Sit glorificatio,
Unitati coaeterna

Cordis iubilatio,
Ad quam ducat nos materna

Virginis oratio.