334. De ss. Rufina et Secunda.

1. Corde fideli voceque sonora

Virginum, Christe, canimus triumphum
Rufinae atque Secundae sororum ;
Suscipe votum.

2. Quae spretis sponsis cunctis et caducis
Te meruerunt utraeque maritum,
Qui cui adhaerens integram conservas
Omne per aevum.

3. Abdicant domum, panes et cibillas
Vectae basterna quondam ut reginae,
Pro dote tibi capita spondentes
Te insequuntur.

4. Nam suadenti principi depromunt:
" Applica ignes, gladios et fustes ;
Promptae nunc sumus omnia subire
Pro Deo vero.

5. "Quotquot, tu nobis adicis flagella,
Tot apud eum dona meritorum
Crescunt et fiunt ; improbe minister,
Fac, si quid haves."

6. De quarum voce incitatus ille,
Quidquid poenarum valuit, peregit ;
Contra naturam cuncta cum respondent,
Totus tabescit,

7. Petitur ensis, quo iam iugulentur
Et tibi dentur sanguine profuso
Inter utrosque choros te beandae
Et coronandae.

8. Quod te fecisse valde nos laetamur,
Qui eas signis hic videmus claras
Optantes frui tua pietate
Precibus harum.

9. Gloria summum resonet parentem,
Gloria natum pariterque sanctum
Spiritum dulci moduletur hymno
Omne per aevum.