342. In Inventione s. Stephani.

1. Sancte Dei pretiose

protomartyr, Stephane,

Qui virtute caritatis
circumfultus undique

Dominum pro inimico
exorasti populo.

2. Tu caelestis primitivus
Signifer militiae,
Veritatis assertivus

Testis primus gratiae,
Fundamenti lapis vivus,
Basis patientiae.

3. Saxo caesus, non mucrone,
Per saxorum cuspides

Corpus membri passione
Circumcidi praevides,

Ad decorem sunt coronae
Rubricati lapides.

4. Tu caelorum primus stratam
Consternis lapideam,

Tu per Christum hebetatam
Primus transis romphaeam,

Primus granum trituratum,
Christi ditans aream.

5. Tibi primum reseratae
Caeli patent ianuae,

Iesum vides, potestate
Cuius pugnas strenue,

Stans cum patris maiestate
Tecum est assidue.

6. Praestans genti persequenti
Preces pro lapidibus,

Ne rependas te petenti
Lapides pro precibus,

Sed indulge piae menti
Plus, quam audet vocibus.

7. Funde preces pro devoto

tibi nunc collegio,
Ut tuo propitiatus

interventu Dominus
Nos purgatos a peccatis

caeli iungat civibus.

8. Gloria et honor Deo,

Qui te flore roseo
Coronavit et locavit

In throno sidereo,
Solvat reos salvans eos

A mortis aculeo.