358. De s. Thoma Cantuariensi.

1. Thomae sacrata passio
Summo colenda gaudio
Huius diei circulo
Lucescit omni saeculo.

2. Laetare, Sion filia,

Erumpe laudans, Anglia,
Dic laeto cantu cantica,
Quae pugna, quae victoria.

3. Athleta Christi nobilis.
Vir fixus ac immobilis,
Stans in petrae fundamine
Nullo movetur turbine.

4. Duris tyranni legibus
Vivis reclamat vocibus,
Dum liber arcet crimina,
Vitae subit discrimina.

5. Intrat marina caerula
Parva receptus cimbula;
Christi regens hanc dextera
In parte sistit altera.

6. Hinc exsul urget acrius,
Hostem premit potentius,
Eludit artes artibus,
Vires refringit viribus.

7. Tandem reversus prospere,
Dum nescit hosti cedere,
Pacis revulso foedere
Victor ruit sub vulnere.

8. Summae virum constantiae
Vox pulset huius curiae,
Nobis fluenta gratiae
Infundat ut rex gloriae.

9. Deo patri et filio,
Sancto simul paraclito
Laus et perennis gloria
In sempiterna saecula.