498. In translatione sancti Wolfgangi.

1. Aeterne rex altissime,
Preces tuorum suscipe
Honore tui praesulis.
Cujus festa recolimus.

2. Qui natus ex ingenuis
Parentibus Suevigenis,
Mundique hujus levia
Hic sprevit ab Infantia.

3. Edoctus sacris literis
Doctrinisque mirabilis,
Exhinc direxit animum,
Ut sequeretur Dominum.

i. Reliquit domum paternam
Terrenamque substantiam
Cunctam contemnens saeculi
Juxta praeceptum Domini.

5. Tandem petens coenobium
Fit monachorum speculum,
Talis vixit sub regula,
Ut ejus probant merita.

6. Dum In sulcis sterilibus
Arat doctor catholicus
Paganorumque perfida
Revocare volens corda,

7. Caesar Otto praeconiis
Tactus digni pontificis,
Doctorem vocat exsulem,
Dat Ratisbonae praesulem.
8. Peractisque bis undenis
Annis sui regiminis
Coelo commendans spiritum
Terrae dat carnis habitum.
9. Multis signis dum claruit,
Regi summo qui placuit,
Caesar et papa veniunt,
Sanctum de terra erigunt.

10. Transfert papa pontificem
Sacerdosque sacerdotem,
Sacrat et pius humilem
Et confessor confessorem,

11. Et tu, praesul clarissime,
Wolfgange beatissime,
Confer et opem omnibus
Ad te confugientibus.

12. Ipsi canamus gloriam,
Trinam regenti machinam,
Qui nos Wolf[gangi precibus
Collocet In coelestibus].