424. (7. ) Rigmus ymnicus decani Xantensis.

1. Conditor rerum omnium, Spes unica credentium, Depelle omne somnium, Quo torpet virtus mentium, Ut in adventu filii A te possimus diligi Eundem diligentes.

2. Qui protoplasto condolens Eiusdem perpere factum A nobis pie removens, Tuus implet natus pactum, Ex te nobis tandem datus, Nostra culpa trucidatus Iudaeos per amentes.

3. Vergente caeli numine Verbum angelus nuntiat, Maria novo lumine, Quo Christum nobis pariat, Microcosmi salvatorem, Qui per pium nos amorem A gehenna protegat.

4. Cuius forti potentiae Nemo potest resistere, Sed tantae est clementiae, Qua nequimus deficere; Hinc eandem imploremus, Ut peccata emendemus, Quae hic pie corrigat.

5. Occasum sol retineat Cata mane refulgendo, Alba luna emineat Nos simul respiciendo, Ut extremo iudicio Sistamus sine vitio Casta meriti vita.

6. Te deprecamur, Domine, Qui lapsum scis in homine, Incastitatem reprimas, Frugalem vitam conferas, Ut tecum in laetitia Tandem sine maestitia Canamus omnes ita.