Ad Completorium.

Antiphona. Sancta Maria virgo.

Psalmus.

Deus vitam meam annuntiavi tibi: posuisti lacrymas meas in conspectu tuo.

Omnes inimici mei adversum me cogitaverunt mala mihi: consilium fecerunt in unum.

Et posuerunt adversum me mala pro bonis: et odium pro dilectione mea.

Pro eo, ut me diligerent, detrahebant mihi: ego autem orabam.

Mi Pater sancte, rex coeli et terrae, ne discesseris a me: quoniam tribulatio proxima est, et non est, qui adjuvet.

Convertentur inimici mei retrorsum, in quacunque die invocavero te: ecce cognovi, quoniam Deus meus es.

Amici mei et proximi mei adversum me appropinquaverunt et steterunt: et proximi mei de longe steterunt.

Longe fecisti notos meos a me, posuerunt me abominationem sibi: traditus sum et non egrediebar.

Pater sancte, ne elongaveris auxilium tuum a me: Deus meus ad auxilium meum respice.

Intende in adjutorium meum: Domine Deus salutis meae.

Gloria Patri et Filio et Spiritui sancto.

Sicut erat in principio et nunc et semper: et in saecula saeculorum, amen.

Antiphona.

Sancta Maria virgo, non est tibi similis nata in mundo in mulieribus, filia et ancilla altissimi Regis, Patris coelestis, mater sanctissima Domini nostri Jesu Christi, sponsa Spiritus sancti: ora pro nobis cum sancto Michaele archangelo et omnibus Virtutibus coelorum, omnibus sanctis, tuum sanctissimum Filium dilectissimum Dominum nostrum et magistrum, amen.

Gloria Patri etc.