Rubrica.

Similiter celebratur officium a die Nativitatis Domini usque

ad octavam Epiphaniae, excepto, quod ad omnes horas

incipiendo a Vesperis diei dicatur hic psalmus.

Exultate Deo adjutori nostro: jubilate Domino Deo vivo et vero in voce exultationis.

Quoniam Dominus excelsus, terribilis: rex magnus super omnem terram.

Quia sanctissimus Pater de coelo rex noster ante saecula, misit Filium suum de alto: et natus fuit de beata virgine Maria.

Ipse invocabit me: Pater meus es tu: et ego primogenitum ponam illum excelsum prae regibus terrae.

In illa die mandavit Dominus Deus misericordiam suam: et nocte canticum ejus.

Haec est dies, quam fecit Dominus: exultemus et laetemur in ea.

Quia sanctissimus puer dilectus datus est nobis et natus fuit pro nobis in via et positus in praesepio: quia non habebat locum in diversorio.

Gloria in altissimis Domino Deo: et in terra pax hominibus bonae voluntatis.

Laetentur coeli, et exultet terra, commoveatur mare et

plenitudo ejus: gaudebunt campi et omnia, quae in eis sunt.

Cantate ei canticum novum: cantate Domino omnis terra.

Quoniam magnus Dominus et laudabilis nimis: terribilis

est super omnes deos.

Afferte Domino patriae gentium, afferte Domino gloriam et honorem: afferte gloriam nomini ejus.

Tollite corpora vestra et bajulate sanctam crucem ejus: et sequimini usque in finem praecepta ejus. Gloria Patri etc.

Antiphona. Sancta Maria virgo, non est tibi similis nata in mundo etc.

Gloria Patri etc.