427. (1. ) De septem festis Virginis.

1. Ave, genetrix, Maria, Dei veri et hominis, Plena superni numinis,

Offerimus mente pia,

Per quod mundus renovatur, Dum Ex Eva Ave datur;

Suscipe, virgo Maria.

2. Ave, carens infamia,

Cuius fuit conceptio Dotata privilegio, Quod non est datum in via Filiabus Adae natis Neque filiis damnatis; Salva nos, potens Maria.

3. Ave, in innocentia

Concepta et praeservata, Nulla labe maculata

Dextrae Dei potentia Peccati originalis Nec cuiusquam actualis;

Ab his nos solve, Maria.

4. Ave, de stirpe regia

Orta, cuius nativitas Mundi fuit iucunditas,

Angelorum laetitia,

Cuius ortu mors moritur Et vita restituitur;

Hanc nobis confer, Maria.

5. Ave, cuius infantia A tua nativitate Superavit claritate

Caelorum luminaria, Ut Lucifer principians Ortum solis denuntians;

Illumina nos, Maria.

6. Ave, virginum gloria

Quam mira praesentatio Gratam pro Dei filio

Fecit patris clementia, Dum in templo praesentata Fuisti et acceptata;

Acceptos fac nos, Maria.

7. Ave, superans lilia, Cuius praesentatione Plena admiratione

Illustratur ecclesia,

Dum virgo trium annorum Data es Deo deorum;

Dona ei nos, Maria.

8. Ave, transcendens omnia, Cuius annuntiatio A Gabriele nuntio

De caelesti hierarchia Facta est Dei virtute Pro electorum salute;

Fac de illis nos, Maria.

9. Ave, mater et filia,

Deo patri valde grata, Pro filio salutata

Aeterna sapientia,

Ut tu esses digna mater Eius, qui est noster frater;

Fac simus digni, Maria.

10. Ave, facta praenuntia Tua visitatione De Christi conceptione,

Nova nuntians gaudia Elisabeth visitando, Magnificat decantando;

Sic visita nos, Maria.

11. Ave, quae post colloquia Tuae salutationis Atque visitationis

Iohannem plenum gratia Dignum esse meruisti, Dum matrem visitavisti;

Ne deseras nos, Maria.

12. Ave, virgo eximia,

Cuius purificatio Facta cum tuo filio

Humilitate nimia

Est die quadragesimo Ab eius ortu maximo;

Purifica nos, Maria.

13. Ave, plena munditia,

Quae salvatorem portasti Ad templum et praesentasti,

Quem mira reverentia Senex Simeon suscepit Et post mortem laetus cepit;

Fac sic mori nos, Maria.

14. Ave, magnificentia

Exaltata super caelos, Cui concinit dulce melos Angelorum militia,

Dum super omnes assumpta Fuisti carne resumpta; Post te trahe nos, Maria.

15. Ave, suprema praemia In tua assumptione Ac glorificatione Obtinens atque gaudia, Quae post Deum exaltaris Ac ubique dominaris; Semper rege nos, Maria.

16. Deo patri sit gloria Eiusque unigenito Cum spiritu paraclito

Per saeculorum spatia Tibique, nostra salvatrix Atque mundi gubernatrix;

Glorifica nos, Maria.