172. (1. ) De Paschali Festivitate.

Sedulius composuit.

1. Haec est alma dies, sanctarum sancta dierum, Veris pulcher honos signiferique decus. Hic est namque dies, Dominus quem fecit Iesus, In quo laetetur cosmicus orbis ovans.

2. Crinibus hunc niveis croceo vestitus amictu Solis ab exortu lucifer, ecce, stupet. Clarus et occiduis rutilascit Vesper in horis Atque sui Domini noscit amore diem.

3. Vernat stelligeri Septemtrio cardine caeli Haec septenaria lampade festa colens. Aegypti tenebras dispellit luce Canopus Ac sic lucifluos spargit ab ore globos.

4. Aurea sideream transcurrit luna per aethram, Gestans sceptrigerum nunc diadema novum Ipsaque celsithroni miratur cornua Christi Exaltata, sui principis ac domini.

5. Titan gemmigeri centrum conscendit Olympi, Ardens flammivomis emicat, ecce, rotis. Victorem celebrat Christum rota fulgida solis, Dum fit nocte nitens maior in orbe dies.

6. Tellus florigeras turgescit germine bulbas

Floribus et pictum gaudet habere peplum. Nunc variae volucres permulcent aethera cantu, Produnt organulis celsa tropaea novis.

7. Exsultant caeli, laetatur terreus orbis, Nunc Alleluia centuplicatque tonos. Nunc chorus ecclesiae hymnizans cantica Sion Ad caeli superos tollit Hosanna polos.