COLLATIO XXII.

(Vers. 21.). Sicut Pater suscitat mortuos et vivificat, sic et Filius quos vult vivificat.

1. Nota, quod mortui vivificantur a Deo, a Christo et ab homine. - Deus vivificat mortuos effective: ad Romanos quarto V "Ipse vivificat mortuos ", scilicet effective, " et vocat ea quae non sunt, sicut ea quae sunt". - Christus, meritorie: primae ad Corinthios decimo quinto: " Sicut in Adam omnes moriuntur, ita et in Christo omnes vivificabuntur ".

- Homo, dispositive: unde Isaiae quinquagesimo septimo: " Vivificat spiritum humilium et vivificat cor contritorum "

2. Pater, inquit, suscitat mortuos et vivificat.

Nota, quod Pater vivificat a morte naturae, a morte culpae, a morte miseriae.

A morte naturae suscitantur tam iusti quam iniusti; a morte culpae omnes, tam electi quam praesciti: a morte miseriae tantummodo electi.

Vivificat ergo a morte naturae: ad Romanos quarto : "Ipse est qui vivificat mortuos ".

- A morte culpae: Isaiae quinquagesimo septimo: " Habitat cum contrito et humili spiritu, ut vivificet spiritum humilium et vivificet cor contritorum ". -Vivificat a morte miseriae: ad Romanos octavo: " Qui suscitavit Iesum a mortuis vivificabit mortalia corpora nostra propter eius spiritum inhabitantem in vobis ". - Pater, inquit, vivificat mortuos. Require supra quarto capitulo de signis vitae et mortis spiritualis.

3. Filius quos vult vivificat.

Nota, quod quaedam sunt, quae vitam spiritualem ostendunt, de quibus supra habitum est: quaedam vero, quae ad vitam spiritualem disponunt. Ad vitam spiritualem disponit se homo et etiam disponitur a Deo.

- Disponit autem se homo tripliciter: Peccatum dimittendo: Ezechielis decimo octavo : " Si averterit se impius ab impietate sua, quam operatus est,

et fecerit indicium et iustitiam, animam suam vivificabit ". - De peccato dolendo: Isaiae quinquagesimo septimo: "Dominus habitat cum contrito et humili spiritu" etc. - In bono se exercendo: Psalmus: "In aeternum non obliviscar iustificationes tuas, quia in ipsis vivificasti me "-

Disponitur etiam homo a Deo tripliciter: flagello correptionis: primi Regum secundo : "Dominus mortificat et vivificat ". Verbo praedicationis: Psalmus: " Eloquium tuum vivificavit me ". Gratia inspirationis: Psalmus: " Conversus vivificasti me, et de abyssis terrae iterum reduxisti me ".