COLLATIO LVII.

(Vers. 13.). Cum autem venerit ille Spiritus veritatis, docebit vos omnem veritatem.

Duo tanguntur in verbis istis: primo, Spiritus sancti adventus, cum dicitur: Cum venerit etc: secundo, advenientis effectus, cum subiungitur: Docebit vos etc.

Ait ergo: Cum venerit Spiritus sanctus, qui scilicet solet venire, ubi diligitur, ubi invitatur et ubi exspectatur. Require de hoc supra capitulo decimo quarto .

2. Docebit vos omnem veritatem, quae triplex est, scilicet veritas doctrinae, quae necessaria est contemplativis; de qua Matthaei vigesimo secundo : " Magister, scimus, quia verax es et viam Dei , in veritate doces ".

Veritas vitae, quae necessaria est activis: de qua Isaiae trigesimo octavo: (Memento, Domine, quomodo ambulaverim coram te in , veritate et in corde perfecto ". - Veritas iustitiae, quae necessaria est praelatis: de qua Proverbiorum decimo octavo: " Accipere personam impii non est bonum, ut declines a veritate iudicii ",

8. Vel aliter distingue: quia Spiritus sanctus solet venire, ubi diligitur, ubi invitatur et ubi exspectatur, ubi ei hospitium praeparatur: et tunc . adiunge, quod docet quadruplicem veritatem, scilicet veritatem cognitionis: unde Psalmus : " Qui loquitur veritatem in corde suo " etc.

Veritatem intentionis: de qua Ioannis octavo: "In veritate non stetit", dicitur de diabolo; et Ioannis septimo: " Qui quaerit gloriam eius qui misit illum, hic verax est".

Veritatem locutionis: de qua Zachariae octavo: " Loquimini veritatem unusquisque cum proximo suo ".

Veritatem operationis: de qua primae Ioannis tertio : " Non diligamus verbo neque lingua, sed opere et veritate "; et Ioannis tertio: " Qui facit veritatem venit ad lucem ".