1. In Vigiliis sancti Galdini.

Ad Vesperas.

Lucernarium.
R. Est Mediolanensium

Pastor sidus singulare,
Galdinus in ecclesia

fulgens magnum luminare,
V. Verbo lucens et opere

ministrat lucem populo,
Quem ipse pascit triplici
pius Galdinus pabulo.

In Choro.
A. Gens Mediolanensium,
festivo gaude gaudio,
Quae tuam prolem aggregas

confessorum collegio,
Galdinum, qui te adjuvat
multiplici suffragio.

Cum Infantibus.
R. Galdinus totus affluit
pietatis operibus,
Qui vitae necessaria

largus donat pauperibus,
Puellis dotes exhibet
munificus egentibus,
Fovet senes et viduas,
patet pupillis omnibus.
V. Felix, qui super pauperes
toto corde intelligit,
Non habentes hospitium
in sua domo colligit.
A. Perituros praeveniens

hic prae cunctis mortalibus
Galdinus pius pontifex
curabat de pauperibus.

A. Perpetuam consequitur
regni sedem in gloria
Galdinus ut alter David
sua misericordia.

Ad Magnificat.
A. Redemptorem magnificum
magnificet ecclesia,
Cujus mira magnificat

sanctum magnificentia
Galdinum in coelestibus,
Magnificandum laudibus.

Psallentium in Baptisterio.

Confessor sancte, subveni,
Galdine, tuis famulis,

Libera sanctis precibus
a cunctis nos periculis,

Ora Christum, ut nos locet
aeternis habitaculis.

Ad Vigilias.

R. Accensus zelo fidei,

sancta praefulgens vita,
Galdinus cancellarius,
dignus archilevita,
Metropolis Ambrosii
fuit archimandrita.
V. Hic ad Sabinae titulum
cardinalis provehitur,
Quem sic Deus magnificat,
coelorum choro jungitur.
A. Galdini festum praesulis,
Pro fide quondam exsulis,
Celebremus solemnibus
Atque sonoris vocibus.

R. Alexandro, catholico
Papae, Galdinus paruit,
Qui respuens schismaticos
Imperatorem horruit
Et propugnator fidei
Unitatis pugil fuit.

V. Beatus vir abominans
Peccatorum consilium,
Qui sprevit ut catholicus
Schismaticorum devium

A. Ut aqua fons exuberat,
Totus misericordia
Fluit Galdinus, relevans
Afflictos indulgentia.

R. Aures praebet frequentibus
Deus Galdini precibus,
Qui Mediolanensium
Moestorum et dolentium
Destructae urbis moenia
Restaurat sua gratia.

V. Peccantes Deus percutit,
Humiliat justitia,
Humiliatos relevat
Sua misericordia,
Delinquentes vulnerat,
Post sanat, quos percusserat.

A. Galdinus tot assidue
Senex psalmos decantabat,
Quod in psallendo clericos
Psalmodia fatigabat.

Psallentium.

Sic excellenter pontifex
Fuit Galdinus humilis,
Quod propter hoc quam pluribus
Factus est contemptibilis.
In Salla Dei triplici
Refecit alimonia
Galdinus praesul populum,
Ortus Sallae prosapia.

R. In diebus Deo suis
Magnus sacerdos placuit
Galdinus, ante Dominum
Qui repertus justus fuit.

V. Galdinus gratus omnibus
Laetum vultum exhibebat,
Loquela dulcis pontifex
Piam mentem ostendebat.

Psallentium.
Dum impugnat haereticos,
Hic choros intrat coelicos
Cum beatis agminibus
Bonis fruens coelestibas.

Post Kyrie.

A. Sua prece nos Galdinus
Juvet, ne nos dens caninus
Haeretici dilaceret
Aut detractoris vulneret.

Ad Matutinum.

Post hymnum.

R. Alexander tertius

Praefecit Galdinum,

Virum pro ecclesia

Dudum peregrinum,

Mediolanensibus

Providum pastorem,

Cujus totus populus

Currit in odorem.
V. Pastor fuit pervigil

In ovili cura,

Pro commissis ovibus

Multa passus dura.

Inter Lectiones.
R esponsoria.

1. Sancti Galdini studium
Lupos a grege ovium,
Saevos arcet haereticos,
Ipsos damnans falsidicos.

V. Impugnat hic vulpeculas
Vites delere sedulas
In vinea, quae floruit,
Haereticus quam destruit.

2. Per Galdinum sanctissimum
Mira Deus potentia
Pandit ad ejus tumulum
Miracula insignia;

Qui claudis gressum exhibet,
Membra sanat languentia
Atque caecos illuminans,
Multa fugat daemonia.
V, Ostendit ejus meritis
Virtutes et magnalia
Multas, quae jam praecesserant
In primaeva ecclesia.

Ad Benedictus.
A. Sit benedictus Dominus,
Qui Galdinum pontificem
Dat Mediolanensibus
Virtutum et artificem.

Ad Crucem.
A. Crucifixi vestigia
Per viam patientiae
Sequamur, ut ad gaudia
Perveniamus gloriae,
Quam nunc Galdinus obtinet,
Qui quondam dura sustinet,
Pro unitate fidei
Exsul factus pugil Dei.

In Cantemus.
A, Cantet Deo populus
Mediolanensium,
Qui Galdino contulit
Suum pontificium.

In Benedicite.
A. Cuncta Dei opera
Ipsi benedicite,
In Galdini praesulis
Festo hymnum dicite.

In Laudate.
A. Patrem laudemus de caelis
Servi Galdini fidelis
Sui festum celebrantes
Ac devote honorantes.

Psallentium in Baptisterio.
O quam fine laudabili,
Facto sermone nobili
Commisso sibi populo,
De corporis ergastulo
Galdinus ad collegium
Sanctorum transit omnium.

Mane ad Psallentium.

Antiphonae.

1. Non sibi sed pauperibus
Credebatur vivere,
His studens necessaria
Galdinus impendere.

2. Concelebret ecclesia
Confessoris solemnia
Galdini cum laetitia,
Qui fide, verbo claruit,
Sanctitate resplenduit,
Miraculis emicuit.

3. Serve prudens et fidelis,
Subvenire nobis velis
Te cunctis reverentibus,
Galdine, tuis precibus.

4. Praesul mirae sanctitatis
Cum talentis duplicatis
Est Galdinus cum beatis.

5. Divinis instat laudibus,
Vacans orationibus,
Psalmodiis, vigiliis
Galdinus et jejuniis.

6. O quam felix est Galdinus,
Abrahae quem tenet sinus,
Quo quiescit feliciter
Atque delectabiliter.

7. Cogitat assidue
De morte Galdinus,
Spernens transitoria
Velut peregrinus,
Putans contemptibile,
Quod non videt stabile.

8. In Galdino Dominus
Loqui videbatur,
Cum pastor ad populum
Docens loquebatur.

9. Magnificemus Dominum
Cum laudibus magnificis,
Galdinum qui magnificat
Virtutibus mirificis
Et locat mansionibus
Aeternae vitae coelicis.

10. Galdinum fidelissimum
Miraculorum gratia
Mirificavit Dominus
Mirabili potentia.

11. Obedire Pederico

Galdinus constans noluit,
Qui respuens schismaticos
Peregrinari maluit.

12. Mediolani civitas,
Adsit tibi jucunditas,
Gaudiis gaude festivis,
Nam Galdinus, tuus civis,
Gaudet consors concivium
Felix factus coelestium.

13. In milleno centesimo
Anno septuagesimo
Sexto Christi coelestium
Galdinus scandit solium.

Post Kyrie.

A. Sanctus Galdinus pontifex
Per pietatis opera
Fuit in domo Domini
Ut oliva fructifera,
Qui locum habens gloriae
Nunc regnat super sidera.