3. In Vigiliis sanctorum martyrum
Naboris et Felicis.

In 1. Vesperis.
Antiphonae.

1. Nabor et Felix, genere
Mauri, divino munere
Cultum spernunt idolorum,
Regem colunt angelorum.

2. Fide fuerunt milites
Christi athletae incliti,
Justitiae operibus
Nabor et Felix dediti.

3. Non seducti blandimentis,
Non promissis, non tormentis
Nabor et Felix idola
Colunt, sed spernunt frivola.

4. Muniti scuto fidei
Et lorica justitiae
Nabor et Felix pugiles
Fortes sunt Christi acie.

5. Quam Naboris et Felicis
Mors sanctorum pretiosa,
Qui tyrannos prosternentes
Palma gaudent gloriosa.

Ad Magnificat.

A. Nabor et Felix martyres,
Virtutibus magnifici.
Magnificate Dominum,
Chori concives coelici,

Qui sua vos magnifica
Magnificavit gloria,
Magnificandos laudibus
Festiva cum laetitia.

Ad Matutinum.
Imitatorium.
Deo nostro salutari
Exsultantes jubilemus
Atque beatos martyres
Reverenter honoremus.

In 1. Nocturno.
Antiphonae.
1. Capti a Maximiano
Diro clauduntur carcere
Nabor et Felix, milites
Insignes, Mauri genere.

2. In fidei certamine
Divina fortitudine
Sancti vincunt supplicia
Cum triumphali gloria.

3. Quam Naboris et Felicis
Est beata militia,
Quam Dominus remunerat
In supernorum patria.

Responsoria.

1. Festum sanctorum martyrum
Celebremus solemniter,
Revereamur martyres
Omnes honorabiliter
Naborem atque Felicem
Triumphantes feliciter.

V. Quorum beatis meritis
Suffragiis et inclitis
Tanto magis adjuvamur,
Hos quo magis veneramur.

2. Terram Mauritaniae
Natale solum deserunt,
Ad partes Italiae
Nabor, Felix se transferunt,
Qui pro Christi nomine
Mortem laude suscipiunt
Et coelestes incolae
Veram vitam inveniunt.

V. Reverendorum martyrum
Quam felix est collegium,
Quibus in Christum credere
A Deo privilegium
Datur et vitam ponere
Pro Christo per martyrium.

3. Quem salvatorem hominum
Concepit virgo virginum,
Laudemus omnes Dominum,
Sauciorum decus agminum.

V. Stolas pro cujus nomine
Laverunt agni sanguine
Nabor atque Felix pii
Cum triumpho martyrii.

In 2. No cturno.
Antiplionae.

1. Fidem inexpugnabilem
Superare non potuit
Tyrannorum saevitia,
Quae pugnando succubuit.

2. Cum Victore Nabor, Felix
Consocii martyrio,
Fide concives, patria,
Sunt et coronae praemio.

3. Immissi sancti martyres
Nabor et Felix ignibus
Egressi sunt incolumes
Nullis adusti partibus.

Responsoria.

1. Sapientes exstiterunt

Nabor Felix, qui spreverunt

Cuncta transitoria
Atque Christum dilexerunt,
Pro quo mortem subierunt
Cum triumphali gloria.
V. Armis muniti fidei,

Veri Christi zelatores,
Carnem, mundum, diabolum
Fortes vincunt bellatores.
2. Sunt decollati martyres
Juxta flumen Exeleram,
Qui pro perenni gloria
Vitam hanc spernunt miseram,

Desiderantes potius
Pro Christo vitam perdere,
Quam immolare idolis
Et falso mundo vivere.

V. Vita vivunt sine morte
Beatorum sumpta sorte,
Qui pro Christo jugulati
Sunt ab ipso coronati.

3. Religiosum studium

Sabinae transfert feminae
Mediolanum corpora
Passa pro Christi nomine,
Imposita vehiculo
Devoto donans populo.

V. Urbs Mediolanensium,
Hanc Sabinam venerare,
Quae thesauro ditissimo
Procuravit te ditare.

In 3. Nocturno.
Antiphonae.

1. Fuerunt sancti martyres
In Christi viridario
Olentes rosae rubeae
Rubricati martyrio.

2. Philippi viridarium
Sanctorum est hospitium
Cum Christo jam regnantium
Et fratrum hic degentium.

3. Exsultant nunc in gloria
Sancti cum sanctis omnibus,
Nabor et Felix martyres
In supernis cubilibus.

Responsoria.

1. Mediolani civitas,
Adsit tibi jucunditas,
Quam sanctorum praesidium
In te requiescentium
Tuetur ab insidiis
Et hostium nequitiis.

V. Nabor et Felix precibus
Piis tibi subveniunt,
Quorum beata corpora
Locum in te recipiunt.

2. In Naboris et Felicis
Festivo natalitio
Festivas laudes resonet
Christianorum concio,
Ipsos cum reverentia
Honoret et cum gaudio.

V. Dei nimis honorandi
Sunt amici et laudandi,
Quem in sanctis honoramus,
Honorantes collaudamus.

In Laudibus.
Antiphonae.

1. Sanctos Christus induit
Mira fortitudine,
Praecinxit virtutibus
In omni certamine,
De quorum Nabor, Felix
Sunt beato agmine.

2. Nabor, Felix, exsultate,
Deo Jacob jubilate,
Qui vos passos honoravit
Et depressos exaltavit.

3. Nabor, Felix ad Dominum
Sancti de luce vigilant,
Qui fidei et operum
Splendore clari rutilant.

4. Deum benedicite,
Coeli, terra, maria,
Hymnum sibi dicite,
Qui creavit omnia,
Pro quo Nabor et Felix
Passi sunt martyria.

5. Collaudemus solemnibus
Deum in sanctis laudibus,
Quem Nabor, Felix patria
Dignum collaudant gloria.

Ad Benedictus.

A. O gloriosi martyres,
Nabor et Felix, fundite
Pias preces ad Dominum,
Pro nobis intercedite,
Ut hic det nobis gratiam
Et in futuro gloriam.

In 2. Vesperis.

Antiphonae.

1. Gaudeant fratres Minores,
Crucifixi zelatores,
Hospites facti sanctorum
Martyrum et confessorum.

2. Sancti loqui non trepidant
Coram regum saevitia,
Quos amor Christi fecerat
Audaces cum constantia.

3. De pretioso lapide
In martyrum capitibus
Coronas ponit Dominus,
Qui coeli gaudent sedibus.

4. Sancti regna contempserunt,
Quae per fidem devicerunt,
Operati justitiam
Sunt consecuti gloriam.

5. Jacent sanctorum corpora
Pacis sepulta requie,
Semper ipsorum nomina
Vivent vita memoriae.

Ad Magnificat.
A. Magnificemus Dominum
Magnificum per omnia,
Qui Naborem et Felicem
Pia magnificentia
Magnifice magnificat
In supernorum patria;
Hos laudibus plebs omnium
Magnificet fidelium.

In Commemoratione.

A. Hortus Philippi redolet
Rosis, violis, liliis,
Martyribus, virginibus
Et confessoribus piis,
Quorum pars peregrinatur,
Pars cum Christo gloriatur.