16. De sancta Margarita.
Ad Missam.

Ingressus.

Ab Olybrio tyranno
Gravibus poenis attrita,
Martyr est ingressa coelum
Prudens Tirgo Margarita,
Quae cum sponso glorioso
Sempiterna gaudens vita
Gloriosae sedis regni
Est corona redimita.

Psalmellus.

Est de quinque virginibus
Margarita prudentibus,
Quas non cum vasis vacuis
Exclusis quinque fatuis
Intrantes Christus dapibus
Nunc cibat nuptialibus,
Quam coronavit hodie
Christus Jesus, rex gloriae.
V. Margarita juvencula

Velox ad Christum properat,
Ne praecludatur janua,
Si hanc intrare differat.

In Alleluja.

Margaritam fortificat
Christus suam pugnatricem,
Quam per virtutem fidei
Reddidit ipse victricem.

Ante Evangelium.

Fidejussoris gratiam
Prudens virgo non oblita,
Poena mortis recompensat
Mortem Christi Margarita.

Post Evangelium.

Margarita juvencula,
Dilectrix Christi sedula,
Venusta sine macula,
Vitans mundi pericula,
Intravit Christi famula
Coelorum habitacula.

Offerenda.

Dat Margarita Domino
Se gratum sacrificium,
Acceptam praebens hostiam
Se per dirum martyrium,
Equuleo et facibus
Ardentibus affligitur
Et decollata gladio
In coelo haec recipitur.

Confractio.

Corpus Christi nunc frangitur
Sub vera panis specie,
In nulla tamen scinditur
Parte suae substantiae,
Quod concepit et peperit
Maria, templum gratiae,
Sine jactura qualibet
Virginalis munditiae;
Cum qua regno perfruitur
Nunc Margarita gloriae.

Transitorium.

Ut salutis fidelibus
Proficiat juvamine,
Conceptum sancto spiritu
Sine virili semine
Sumit sacerdos Domini
Corpus natum de virgine,
Pro cujus mortem pertulit
Haec Margarita nomine.