37. De sancto Ottone.

In 1. Vesperis.

R. O magnum et memorandum,
O vere beatum virum,
Cuius tanta industria
Sancta crevit ecclesia,
Qui Christo Domino novam
Lucratus est familiam.

V. ''Operibus manuum eius bene-
dixit Dominus.''

Ad Magnificat.

A. Gloria sanctorum,

Iesu, spes, vita tuorum,
Cuius suffulta gratia
Gaudet beata anima
Pii praesulis Ottonis
Aeternis ditata bonis,
Annue votis supplicum
Pastorem venerantium,
O summe princeps pastorum.

Ad Matutinum.
Invitatorium.

Pervigiles in laudibus
Domino exsultemus,
Qui pium patrem Ottonem
Suam duxit in requiem.

In 1. Nocturno.
Antiphonae.

1. Ex nobili prosapia
Genuit felix Suevia
Ottonem, Dei gratia
Quem nutrit ab infantia.

2. Hic ad exemplum sanctorum
Facies animalium
Imitatur caelestium
Assumens pennas virtutum.

3. Spernens mundi vanitatem
Per fidem, spem, caritatem
Iugiter crevit in Deum,
Summam sperans praemiorum.

Responsoria.

1. Claris ortus natalibus

Otto praesul venerandus,

Religiosis actibus

Ornare studuit suae

Nobilitatis lineam,
V. Gratia Christi praeventus

Divinis rebus intentus.

2. Religiosus et pius
Puer gravitate morum
Crescens in virum perfectum

Profectu virtutum scandit

Altum praesulatus gradum,
V. Non sibi sumit honorem,

Sed vocatus tamquam Aaron.
3. Bonus pastor in populo

Et caelestia commoda

Et terrena stipendia

Suis praebuit ovibus,
V. Fidelis et prudens dispensator

Dominici tritici mensuram.

In 2. Nocturno.
Antiphonae.

1. Amator religionis

Maximis virtutum donis
Caelitus erat ditatus,
Deo in omnibus gratus.

2. Ordine promotus sacro
Venerabilis Otto
Ut gemma fulsit in clero
Omnem transcendens gratiam.

3. Christum diligens ardenter
Miseretur hilariter
Et tribuit simpliciter,
Quae in terris possederat.

Responsoria.

1. Flagrans divini amoris
Igne vir venerabilis,
Verbo praedicationis
Infudit lumen fidei
Idolatrae nationi
V. Domino cooperante

Et sermonem confirmante.

2. Sacerdos apostolicus
Praeclarum virtutis opus
Inter gentes operatus
Aedes profanas destruxit
Et ecclesias construxit.

V. Quoniam immolaverunt
Daemoniis et non Deo,
Diis, quos ignorabant.

3. Aestuans igne divino
Venerandus praesul Otto

Divini operis fructum
Propensius exsequitur,
Monasteria construens
Et sanctorum gregem pascens.
V. ''Iucundus homo, qui miseretur
et commodat.''

In 3. Nocturno.
Antiphonae.

1. A Domino praeelectus

Sublimatur vir beatus

In sede pontificatus

Deo dignus episcopus.
2. Coenobiorum fundator,

Sacri cultus propagator

Ecclesiis, quas construxit

Praedia large tribuit.

3. Fungitur apostolico
Vir beatus officio,
Cum Paulo ad gentes missus
Gentium fit apostolus.

Responsoria.

1. Favente Christi gratia

Doctor prima haec spolia

Tulit de idolatria

Tria hominum milia,

Quae convertit ad Dominum;
V. Adduntur his multo plura

Pommeranorum milia.
2. Furens gentilium turba

In necem sancti armatur,

Sed manus omnipotentis

Brachia eorum ligat,

Ne servum Christi laederent.
V. Irruit super eos formido et

pavor in magnitudine brachii

tui, Domine. 3. Hodie vir clarissimus,
Pommeranorum apostolus,
Ad patres suos collectus
Assumptus est in requiem
Post huius vitae laborem,

V. ''Ut inhabitet in domo Domini
in longitudinem dierum.''

In Laudibus.
Antiphonae.

1. Ad opus Dei strenuus
Pius Otto episcopus
Ecclesias, quas fundavit,
Bonis plurimis ditavit.

2. Ecce, floret ut lilium
Illius sacerdotium,
Cuius pia memoria
Permanebit in saecula.

3. Lucet verbo et exemplo
Praesul venerandus Otto,
Cuias praedicatione
Fructus crevit ecclesiae.

4. Almi patris industria
Multa dedit incrementa
Ecclesiae catholicae
Gentium conversione.

5. O Christe, Ottonis decus,
Hic laus tua, tu illius,

Cui cum sanctis perpetua
Das perfrui laetitia.

Ad Benedictus.

A. Quasi stella matutina
In huius mundi tenebris
Virtutum lucet exemplis
Vita tanti pontificis
Ad dirigendos pedes
Nostros in viam pacis.

In 2. Vesperis.
Ad Magnificat.

A. O pietas salvatoris
Per omnia laudabilis,
Qui famulum suum vere
Vivere monstrat apud se,
Cuius illustrat tumulum
Gratia curationum.