4. In Vigiliis beatae Annae.

Ad Vesp eras.

Lucernarium.

R. Anna Mariam peperit,
Insigne decus virginum,
Ex qua lux lucis prodiit,
Christus, salvator hominum:

V. Qui mundum luce gratiae,
Splendor paternae gloriae,
Coelestis rex militiae,
Ducit ad lumen patriae.

In Choro.

A. Intemeratae virginis,
Sanctae tuae propaginis,
Matris Dei et hominis,
Praelatae cunctis feminis,
Anna, precare filium,
Ut se reddat propitium,
Nobis donans auxilium,
Ipse redemptor omnium.

Cum Infantibus.

E. Beatae Christi aviae
Diem festum celebremus
Omnes cum omni gaudio,
Annam sanctam honoremus
Solemni cum tripudio.

V. Honoris privilegio
Sublimatur singulari,
Avia Dei filio
Anna facta sine pari,
Cujus subsunt imperio
Cuncta coelo, terra, mari.

A. Anna, divino munere
Datur tibi concipere
Christi matrem singularem,
Quae non novit unquam marem.

A. Gaude, Bethlehemitica

Urbs, quam honoravit Anna,
De tuo ipsa sanguine
Mater est nostrae dominae.

In Magnificat.

A. Gaude, coetus Christiane,
In solemni festo Annae
Melodias dulces cane,
Ora Christum, ut nos sanae
Mentis coeli pascat pane.

Psallentium in Baptisterio.

O singularis avia
Christi, tui conditoris,
Ex qua processit filia,
Mater nostri redemptoris,
Perduc nos via regia
Ad adspectum salvatoris,
Ubi omnis laetitia,
Nulla facies moeroris.

R.Arbor Anna fructuosa,
Germen paris gloriosa,
De te nata velut rosa
Est Maria speciosa,

V. Ex qua Christus est productus,
Lignum vitae, dulcis fructus,
Quo ad coelum est reductus
Homo per Satan seductus.

A. Anna, paris stellam prolem,
Quae producit mundo solem,
Hanc obsequiis dedisti
Tu divinis, ut vovisti.

E. Duas sorores legimus
Annam atque Ismeriam,
Quarum dat mundo quaelibet
Valde prolem eximiam,

V. De prima nempe nascitur
Mater nostri salvatoris,
Ex altera progreditur
Sancta parens praecursoris.

A. Mater matris Dei, Anna,
Te plebs laudet Christiana
Corde sed non voce vana,
Mentes nostras clemens sana.

R. Haec per duplex decennium
Non habens Anna filium
De legali conjugio,
Dat creatori omnium

Corde pio votum pium,
Divino quod obsequio
Illam prolem manciparet,
Deus sibi quam donaret.
V. Datur piis parentibus
Sanctum votum voventibus
Praeoptata proles pia,
Virgo virginum Maria,
Quam divinis, ut voverunt,
Mancipare curaverunt.

A. Anna, mater matris Dei,
Te rogamus omnes rei,
Cujus nati Zebedaei
Sunt nepotes et Alphaei.

Psallentmm.

Non inter Juda principes
Tu, Bethlehem, es minima,
Per Annam dux egreditur
De te, proles altissima,
Christus, qui regit populum
Cum supernis et infima.

R. Anna sancta, concepisti
Piam matrem Jesu Christi,
Per quam datur mundo tristi
Salus atque redemptio.

V. Suum natum deprecare,
Ut dignetur nobis dare,
Quod possimus conregnare
In sanctorum collegio.

Psallentium.

Rex sempiternae gloriae,
Fili virginis Mariae,
Tu precibus nos aviae.
Fac tuae cives patriae.

Post Kyrie.

Angelus a Deo missus
Annam flentem consolatur,
Dum de viro redeunte
Prolem sibi dari fatur.

Ad Matutinum.
Post hymnum.

E. Felix Anna, fecundans
In tribus propaginibus,
Quae tres Marias concipis
Amoenis plenas fructibus:
Prima fuit expers maris
Deum praebens hominibus,

V. Secunda Judam, Simonem
Dat et Jacobum minorem,
Parit Johannem tertia
Haec et Jacobum majorem.

Ad Lectiones.
Responsoria.

1. Angelus ait Joachim:
Pariet Anna filiam,
Quam tu Mariam nomine
Vocabis piam regiam,
Spiritus sancti gratia
Repletam ab infantia

V. Genitus mirabiliter
Natus misericorditer
Ex ista Christus omnium
Erit salvator gentium.

2. Anna cum viro Joachim
Ad templum ducit virginem
Deo donantem munera,
Quae parit Deum hominem,
De regali progenie
David trahens originem.

V. Dimissa a parentibus
Cum aliis virginibus,
Ab angelis quotidie
In templo visitabatur,
Haec omnis plena gratiae
Semper Deo fruebatur.

In Benedictus.

A. Profecit in virtutibus
Dimissa a parentibus
Maria in templo Dei,
Qua salvantur omnes rei.

Ad Crucem.

A. Sint in jugi memoria
Passionis supplicia,
Quae patris sapientia
Peccato non obnoxia
In cruce suffert varia,
Per quae ad coeli gaudia
De inferni miseria
Ducit nos cum victoria
Natus ex Annae filia.

In Cantemus.

A. Anna sancta, jucundare,
Meruisti quae portare
Mariam mundi reginam
Peccatorum medicinam.

In Benedicite.

A. Benedicat Anna Deum,
Mater virginis Mariae,
Quae nunc gaudet cum filia
Coelestis consors gloriae.

In Laudate.

A. Omnes fideles populi
Divinis instent laudibus,
In festo Annae jubilus
Sit in eorum cordibus.

Psallentium.

Anna, Deum semper laudes,
Quae Mariae nunc congaudes
In supremo sita poli,
Omni laude digna coli,
Maris stella sociata,
Sanctis choris aggregata.

Mane ad Psallentium.
Antiphonae.

1. Felix tua progenies,
De qua vera lux et dies,
Anna, Christus exoritur,
Per quem nox taetra pellitur.

2. Mater matris Jesu Christi,
Tuo lacte quam nutristi,
Ab inferni morte tristi
Tuos devotos libera,
Ne tormentorum onera
Subeamus mortifera.

3. Ex nobili prosapia
Descendit Annae filia,
Maria, virgo virginum,
Spes atque decus hominum.

4. Ad portam dictam auream
Anna marito obviat,
Justa sermonem angeli
Optata qui renuntiat.

5. Ex Nazareno Joachim
Florido floriferam
Floris campi Jesu matrem,
Virginem puerperam,
Domum panis de Bethlehem,
Anna, das Christiferam.

6. Anna clemens, roga Christum,
Ut expurget mundum istum

A peccatorum sordibus
Informetque virtutibus.

Post Kyrie.

Est donans vel donatio
Annae interpretatio,
Sibi donatur nobilis
Virgo, cui nulla similis,
Haec Maria, stella maris,
Quam tu donans, Anna, paris.

In 2. Vesperis.

R. Ex Anna diu sterili,

Divino dono fertili,

Maria, virgo nobilis,

Processit ramis utilis,

Cujus fructus magnificus

Christus Jesus vivificus ;
V. Qui suavis est odore,

Fructus dulcis in sapore,

Speciosus in decore,

Pretiosus in valore.