6. In Vigiliis Assumptionis BMV.

Ad Vesperas.

Lucernarium.

R. Maria, virgo virginum,

Aaron virga florida,

Lumen produxit luminum,

Stella prae cunctis lucida.

V. Haec, quam in terris filius

Replevit luce gratiae,

Repleta fuit hodie

In coelis luce gloriae.

In Choro.

A. O quam festivum gaudium

Est supernorum civium

De matre juxta filium

Sedente super regium

A dextris nati solium.

Cum Infantibus.

R. Assumptionis virginis

Festum venerabiliter

Fideles colant populi,

Honorent et solemniter,

Cantent ejus praeconia

Et personent suaviter.

V. Haec virgo immaculata,

Mater Dei Deo grata,

Est in coelis exaltata

Et a Christo coronata.

A. Ut oliva fructifera

Per pietatis viscera

Mater miseri cordiae

Ascendit thronum gloriae.

A, In vestitu deaurato

A dextris tuis, Domine,

Stat regina variato,

Cincta virtutum agmine.

In Magnificat.

A. Matrem Christi magnificam

Praeconiis magnificis

Magnificet ecclesia

Cum hymnis atque canticis,

Quae hodie praeficitur

Sanctis choris angelicis.

Psallentium in Baptisterio.

Pia mater salvatoris,

Sociata coeli choris,

Nos commenda cunctis horis

Pietati conditoris,

Ut nos salvet intus, foris

Gratia tui amoris.

Ad Vigilias.

R. Gaudet coetus coelestium,

Quod mater regis omnium

Conscendit regni solium

Assumpta juxta filium,

Spes nostra et refugium.

V. Genitrix Dei deorum

Super choros angelorum

Exaltata est, cunctorum

Advocata peccatorum.

A. Gratiosa mulier

Tunc invenit gloriam,

Cum, vas plenum gratiae,.

Virgo intrat patriam.

R. Admirabantur angeli,

Dum cernerent ascendere

Matrem innixam filio,

Deliciis affluere

Ac ipsi reverentiam

Christum tantam impendere.

V. Mater Dei regalibus

Choris tripudiantibus

Est deducta coelestibus.

A. De valle miseriae

Ad regni palatium

Virgo mater ducitur

Per dilectum filium.

R. Dilecte fili, dexterae

Meae manum tenuisti,

In voluntate virginem

Tua matrem deduxisti,

Cum gloria magnifica

Exaltatam suscepisti ;

V. In sede tuae gloriae

Genitricem exaltasti,

Legem implens Mosaicam

Excellenter honorasti.

Psallentium.

Exaltatur hodie

hominis natura

In Maria virgine,

matre Dei pura,

Ejus super angelos

posita statura,

Quae humana exstitit

felix creatura.

R. Quae est ista, quaerentibus

Angelicis spiritibus,

Ascendentem cernentibus,

Responsio sit omnibus:

V. Haec mater Dei nobilis

Est, angelis mirabilis,

Hominibus amabilis,

Daemonibus terribilis.

Psallentium.

Virgo, stella matutina,

Hospes facta coelestina,

Infirmorum medicina,

Omnes sana nos, regina,

Vitiorum de sentina

Trahe nos ac de ruina.

Post Kyrie.

A. Supportat matrem filius

Assumens super sidera,

Quem virgo beatissima

Portavit intra viscera.

Ad Matutinum.

Post hymnum.

R. Angelorum domina,

Sine pari femina,

Coeli scandens culmina

Sancta lustrat agmina

Et nobis juvamina,

Pia dat precamina.

V. Ipsam Christus amplectitur,

Per quem throno imponitur,

Cum laudibus recipitur,

Sanctis cunctis praeficitur.

Ad Lectiones.

Responsoria.

1. Surgens de throno Salomon

Matri occurrit obviam,

Hanc Christus, rex pacificus,

Honoris reverentiam

Matri reginae contulit

Intranti suam curiam ;

V. Matrem misericordiae,

Repletam dono gratiae,

Recepit Christus hodie

In gloria, rex gloriae.

2. Virgo, sponsa, puerpera,

Quae sine pari altera,

Surge, veni et propera,

Conscendens super sidera

Oblata sume munera;

V. Ad coronam invitata

Es de Libano vocata,

Virgo, sponsa candidata,

Super coelos sublimata.

In Benedictus.

A. Benedicatur Dominus

Natus ex Annae filia,

Quam benedixit hodie

Ipsam sumens in patria.

Ad Crucem.

A. Jesu, nostra redemptio,

Praesta, ut crucis passio

Sit nostra gloriatio,

Per quam mundum redemisti,

Morte mortem diluisti,

Vitam vita reddidisti,

Genitricem sublimasti,

Sublimatam honorasti.

In Cantemus.

A. Cuncti fideles populi

Cantent Deo gloriose,

Qui gloriam perpetuam

Matri dedit gratiosae.

In Benedicite.

A. Beata coeli agmina,

Deum benedicite

Ac de assumpta virgine

Nato ejus psallite.

In Laudate.

A. Nos in assumptae virginis

Festo laudemus Dominum,

Quam ad superna gaudia

Duxit redemptor hominum.

Psallentium in Baptisterio.

Nos adjuva, Christifera,

Quae regnas super sidera,

Nostrorum sana vulnera

Peccatorum mortifera,

Da semper salutifera

Perficere nos opera.

Mane ad Psallentium.

Antiphonae.

1. Totus festivus obvius

Occurrit matri filius,

Quam processionaliter

Septem choris coelestibus

In regnum ducit gloriae

Dulces odas canentibus.

2. David et domus Israel .

Ducunt arcam cum gaudio,

Et matrem Dei angeli

Ducunt innixam filio

In supernam Jerusalem

Sanctorum coetu praevio.

Circumdant flores rosei

Et lilia convallium,

3. Caterva rubra martyrum,

Virginale collegium

Matrem Dei et violae

Confessorum humilium

Scandentem super sidera,

Reginam factam omnium.

4. Columbam, mite animal,

In arcam Noe intulit,

Cum intra regnum coelicum

Mariam Deus extulit,

Quem simplex et mitissima

Virgo columba protulit.

5. Rependit vicem filius

Matri innixae filio,

Quem ipsa beatissima

Saepe portavit gremio.

6. In coelis Christus merito

Donavit habitaculum

Matri, quae suum fuerat

In terris tabernaculam.

7. In sancto, quod creaverat,

Quievit tabernaculo

Christus, qui novem mensibus

Matris fuit corpusculo.

8. Virgo, Dei genitrix,

Super omnes gratiosa,

Hodie praeficitur

Super omnes gloriosa.

9. Annae recepta filia

Nunc in superna patria

Consociatur filio

Perenni fruens gaudio.

10. Decoram habens faciem,

Rex, virgo, tuam speciem

Concupiscens desiderat,

Qui pulchram te zelaverat.

11. In terris Dei genitrix

Super omnes humillima,

Super omnes efficitur

Coeli sanctos altissima.

12. Floris Christi florifera,

Quae sedes super sidera,

De valle nos hac misera

Transfer ad bona supera.

Post Kyrie.

A. Anna, gaude felix mater,

Cujus nepos tuus pater,

Christus homo noster frater,

Cujus mater egregia

Tua dilecta filia

Migravit ad coelestia.

In 2. Vesperis.

In Choro.

R. Ascendit sicut virgula

Fumi ex aromatibus

Mater Dei proficiens

Et crescens in virtutibus,

Ut dies verni redolens,

Rosarum septa floribus ;

V. Hanc lilia convallium

Et cuncta florum genera

Regni scandentem solium

Circumdant odorifera.